Двое беларусаў затрыманыя ў Польшчы за гандаль наркотыкамі
2 лютага, Позірк. У Польшчы за гандаль наркотыкамі ў складзе злачыннай групы затрыманыя двое грамадзян Беларусі, паведамляе паліцыя горада Рыбнік (Сілезскае ваяводства).
Усяго па справе затрымана 12 чалавек, іх абвінавачваюць ва ўдзеле ў арганізаванай злачыннай групе, гандлі наркотыкамі і адмыванні грошай.
Справа перададзеная ў суд 30 студзеня.
Адзначаецца, што сабраныя следствам доказы ахопліваюць перыяд з 2023 па 2025 год і тычацца сярод іншага ўвозу ў Польшчу не менш за 267 кг наркотыкаў, якія прынеслі абвінавачаным фінансавую выгаду ў памеры больш за 15 млн злотых (3,5 млн еўра).
Канфіскавана больш за 10,5 кг наркотыкаў. Таксама канфіскавана маёмасць падазраваных на суму каля 1,6 млн злотых (каля 450 тыс. долараў): больш за 360 тыс. злотых наяўнымі, аўтамабілі класа люкс коштам каля 1 млн злотых і замарожаныя сродкі на рахунках на суму больш за 60 тыс. злотых. Акрамя таго, канфіскаваная крыптавалюта на суму звыш 51 тыс. долараў.
Група дзейнічала па ўсёй Польшчы: затрыманні прайшлі ў Глівіцэ, Лодзі, Кракаве і Сасноўцы.
Гл. таксама:
У Польшчы двое беларусаў, абвінавачаных у паветранай кантрабандзе, узятыя пад варту на тры месяцы
За мінулы тыдзень 20 грамадзян Беларусі добраахвотна пакінулі Польшчу на патрабаванне яе ўладаў
