Лукашэнка падпісаў закон, які пашырае практыку дактыласкапіі

2 лютага, Позірк. Закон “Аб змяненні законаў па пытаннях дзяржаўнай дактыласкапічнай рэгістрацыі” падпісаў 2 лютага Аляксандр Лукашэнка, паведамляе яго прэс-служба.

“Дакументам удасканальваецца заканадаўства ў сферы забеспячэння нацыянальнай бяспекі шляхам перагляду катэгорый асоб, якія падлягаюць дактыласкапаванню, а таксама пераліку дзяржаўных органаў, якія яго ажыццяўляюць і маюць права на атрыманне і выкарыстанне дактыласкапічнай інфармацыі”, — гаворыцца ў паведамленні.

Сцвярджаецца, што закон накіраваны на “павышэнне эфектыўнасці і якасці дактыласкапавання, будзе спрыяць своечасоваму выяўленню рызык, выклікаў, пагроз нацыянальнай бяспецы, нейтралізацыі іх унутраных і знешніх крыніц”.

Законапраект ухвалены 21 студзеня Саветам Рэспублікі Нацыянальнага сходу.

13 студзеня законапраект прынялі дэпутаты Палаты прадстаўнікоў у другім чытанні. У першым чытанні законапраект прыняты 5 лістапада 2025 года.

Замацоўваецца абавязак праходзіць абавязковую дзяржаўную дактыласкапічную рэгістрацыю для дадатковых катэгорый замежных грамадзян, асоб без грамадзянства і грамадзян Беларусі.

Органы пагранічнай службы атрымліваюць паўнамоцтвы на абавязковую дактыласкапічную рэгістрацыю “ў прадугледжаных заканадаўчымі актамі выпадках”. У памежнікаў таксама з’яўляецца магчымасць перадаваць Дзяржаўнаму камітэту судовых экспертыз атрыманую дактыласкапічную інфармацыю — у тым парадку, які камітэты сумесна вызначаць.

Пагранічнікам і мытнікам пры памежным кантролі даецца права праводзіць асабісты дагляд грамадзян і рэчаў, якія пры іх знаходзяцца, у тым ліку з дапамогай тэхнічных і спецыяльных сродкаў.

Удакладняецца парадак доступу “зацікаўленых дзяржорганаў” да інфармацыйных рэсурсаў з дактыласкапічнай інфармацыяй.

Дакумент прадугледжвае скасаванне выдачы спецдазволу замежным грамадзянам і асобам без грамадзянства, якія часова знаходзяцца і часова пражываюць у Беларусі, для “ажыццяўлення імі разавай рэалізацыі тавараў на рынках і ў іншых устаноўленых месцах”.

У Палату прадстаўнікоў дакумент унесены 10 верасня 2025 года, 30 ліпеня ён абмяркоўваўся на пасяджэнні экспертнага савета пад кіраўніцтвам старшыні Савета Рэспублікі НС Наталлі Качанавай.

Цяпер пад абавязковае дактыласкапіяванне ў Беларусі трапляюць вайскоўцы, супрацоўнікі праваахоўных органаў, асуджаныя, затрыманыя і арыштаваныя асобы, якія дэпартаваныя або маюць быць высланыя, без вестак зніклыя (з ініцыятывы сваякоў), асобы, якія праходзяць вайсковую або альтэрнатыўную службу, некаторыя катэгорыі дзяржслужбоўцаў з доступам да дзяржаўнай таямніцы.

Пры гэтым пасля тэракту ў мінскім метро 11 красавіка 2011 года адбіткі пальцаў бралі фактычна ва ўсіх мужчын краіны, нягледзячы на ​​тое, што нормы заканадаўства гэтага не прадугледжвалі.