30 студзеня, Позірк. Святлана Ціханоўская і яе офіс пакуль знаходзяцца ў Вільнюсе, паведаміў журналістам галоўны дарадца дэмакратычнага лідара Франак Вячорка, каментуючы матэрыял у польскай газеце Rzeczpospolita, дзе гаварылася пра яе пераезд у Варшаву 30 студзеня.
Вячорка заклікаў дачакацца афіцыйных паведамленняў па гэтай тэме. Паводле яго слоў, зараз вядзецца падрыхтоўчая праца.
“Пачынаючы з пятніцы (30 студзеня), голас Святланы Ціханоўскай у абарону свабоднай Беларусі будзе чутны з Варшавы”, — паведаміла Rzeczpospolita са спасылкай на інфармацыю, дадзеную ёй дэмлідарам падчас знаходжання ў польскай сталіцы 24 студзеня.
У інтэрв’ю Ціханоўская адзначыла, што пасля таго, як стала вядома аб зніжэнні ўзроўню яе аховы ў Літве, менавіта Варшава ёй “першай працягнула руку дапамогі”.
“Я думала, што буду вяртацца на Радзіму з Вільнюса, які знаходзіцца ўсяго за 30 км ад мяжы з Беларуссю. Але ўзровень нашай абароны ў Літве змяніўся. Размова ідзе не толькі аб маёй асабістай бяспецы, але і аб супрацоўніках нашага офіса. Гэта вымусіла мяне шукаць іншыя рашэнні і рэарганізаваць нашу дзейнасць”, — сказала палітык.
Дыпламатычны дарадца беларускага дэмакратычнага лідара Дзяніс Кучынскі 22 студзеня заявіў, што з Вільнюса ў Варшаву пераедзе толькі частка офіса Ціханоўскай, яго дзейнасць у Літве будзе таксама працягнутая.
Аб тым, што Ціханоўская разам са сваёй камандай пераедзе з Літвы ў Польшчу, 17 студзеня паведаміла агенцтва AFP. У матэрыяле гаварылася, што гэтую інфармацыю агенцтву пацвердзілі “чатыры чалавекі з акружэння” палітыка, а таксама польскае Міністэрства замежных спраў.
7 кастрычніка 2025 года стала вядома, што Літва знізіла ўзровень фізічнай аховы Ціханоўскай. Афіцыйная прычына — рэвізія ступені пагроз. Шэраг літоўскіх палітыкаў раскрытыкаваў гэтае рашэнне; прэзідэнт Гітанас Наўседа заявіў, што сітуацыя з аховай Ціханоўскай драматызуецца.
Дэкадай пазней, 17 кастрычніка, з’явілася інфармацыя, што літоўскія ўлады часова вярнулі Ціханаўскую ахову — да таго часу, пакуль не будзе сфарміравана новая сістэма бяспекі.
19 снежня стала вядома, што ахову Ціханоўскай у Літве будзе забяспечваць мясцовая паліцыя. Дарадца літоўскага прэм’ер-міністра Альгірдас Дабравольскас у той жа дзень заявіў, што ахова беларускага палітыка “адпавядае ўзроўню пагрозы”.
Рашэнне было раскрытыкаванае часткай літоўскіх палітыкаў, пераважна апазіцыйных.
