Прадстаўнікі ініцыятывы “Сумленныя людзі” завочна асуджаныя на вялікія тэрміны зняволення і аштрафаваныя на буйныя сумы

22 студзеня, Позірк. Прысуды з вялікімі тэрмінамі зняволення і буйнымі штрафамі вынес 22 студзеня Віцебскі абласны суд прадстаўнікам ініцыятывы “Сумленныя людзі”.

Алена Жылачкіна (Жываглод), Зарына Сарокіна, Алег Давыдчык і Цімафей Малахоўскі абвінавачваліся паводле ч. 1 арт. 361¹ (стварэнне экстрэмісцкага фарміравання альбо ўдзел у ім), ч. 2 арт. 368 (абраза прэзідэнта), ч. 3 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы), ч. 1 і 2 арт. 367 (паклёп у дачыненні да прэзідэнта, уключаючы таго, хто спыніў выкананне сваіх паўнамоцтваў), арт. 369¹ (дыскрэдытацыя Рэспублікі Беларусь), ч. 3 арт. 361 (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы) Крымінальнага кодэкса.

Як паведамляе праваабарончы цэнтр “Вясна“, Жылачкіна (Жываглод) прыгавораная да 10 гадоў пазбаўлення волі, ёй прызначаны штраф у памеры 1.500 базавых велічынь (67,5 тыс. рублёў), Сарокіна, Малахоўскі і Давыдчык атрымалі 8 гадоў і 900 базавых велічынь (40,5 тыс.) штрафу кожны.

Следчы камітэт пачаў спецыяльную вытворчасць у дачыненні да ініцыятывы 20 жніўня 2025 года, завочны судовы працэс праходзіў з 5 лістапада.

Згодна з матэрыяламі справы, фігуранты “з’яўляліся ўдзельнікамі экстрэмісцкага фарміравання “Сумленныя людзі“ і з ліпеня 2020 года да верасня 2025 года ажыццяўлялі злачынную дзейнасць на тэрыторыі Беларусі, Украіны, Польшчы і Літвы”.

Пракуратура Віцебскай вобласці адзначала, што сярод абвінавачаных 34-гадовая жыхарка сталіцы, якая “выступала адным з кіраўнікоў фарміравання, каардынавала злачынную дзейнасць групы“, астатнія ўдзельнікі выконвалі ролі менеджараў, каардынатараў і кіраўнікоў розных праектаў.

“Сумленныя людзі” атрымалі “экстрэмісцкі” статус у 2022 годзе. 18 чэрвеня 2025 года Камітэт дзяржаўнай бяспекі абнавіў спіс датычных да “экстрэмісцкага фарміравання“ “Сумленныя людзі“ — у спіс былі дададзеныя Жываглод, Сарокіна, Малахоўскі і Давыдчык. У “фарміраванне” ўключаныя сайт і акаўнты праекта ў сацсетках.

Кіраўнік ініцыятывы Жываглод ужо асуджаная завочна па “справе зрыву рэферэндуму 2022 года” на чатыры гады пазбаўлення волі па ч. 2 арт. 191 (перашкода працы Цэнтральнай выбарчай камісіі, а таксама камісій па рэферэндуме, здзейсненае з ужываннем пагрозы і іншым спосабам, групай асоб па папярэдняй змове).