Амбасадар Беларусі ў Швейцарыі прысутнічаў на цырымоніі зацвярджэння Трампам статута “Савета міру“

22 студзеня, Позірк. Аб удзеле амбасадара Беларусі ў Швейцарыі Аляксандра Ганевіча ў цырымоніі зацвярджэння статута “Савета міру” паведаміла прэс-служба Міністэрства замежных спраў.

Статут падпісаў 22 студзеня ў Давосе (Швейцарыя) прэзідэнт ЗША Дональд Трамп, які выступіў ініцыятарам стварэння такога органа для ўрэгулявання сітуацыі ў сектары Газа.

“Беларусь у якасці сузаснавальніка Савета міру гатовая адыгрываць актыўную ролю ў фармаванні новай архітэктуры сусветнай і рэгіянальнай бяспекі на прынцыпах узаемнай павагі і безумоўнага ўліку нацыянальных інтарэсаў краін — удзельніц гэтага аб’яднання”, — заявіў МЗС.

Мінск сцвярджае, што падтрымлівае “любыя дыпламатычныя намаганні”, накіраваныя на “дасягненне міру і згоды шляхам дыялогу, забеспячэнне прагрэсіўнага і ўстойлівага эканамічнага развіцця і ўзаемавыгаднага супрацоўніцтва”.

15 студзеня Трамп абвясціў аб фармаванні “Савета міру”, які будзе кіраваць аднаўленнем сектара Газа. Стварэнне гэтай структуры ўваходзіць у мірны план амерыканскага лідара для Газы разам з размяшчэннем міжнародных сіл.

Паводле інфармацыі СМІ, ЗША запрасілі далучыцца да “Савета міру” больш за 50 дзяржаў.

19 студзеня прэс-сакратар МЗС Беларусі Руслан Варанкоў паведаміў, што ў адрас Аляксандра Лукашэнкі паступіў асабісты зварот Трампа, у якім Мінску “ў кантэксце ўрэгулявання сітуацыі ў Газе прапануецца стаць заснавальнікам Савета міру — новай міжнароднай арганізацыі“.

Днём пазней Лукашэнка падпісаў дакумент аб далучэнні Беларусі да арганізацыі.

Ён разлічвае з яе дапамогай “паўплываць на кіраўніцтва ўкраінскае” і наблізіць заканчэнне вайны.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Кіеў адмовіўся далучыцца да ініцыятывы Трампа, паколькі той запрасіў у савет Расію і Беларусь.