Пракуратура канстатавала недаўкамплектаванасць лекарамі медустаноў Магілёўскай вобласці
22 студзеня, Позірк. Адной з ключавых праблем, якія ўплываюць на эфектыўнасць працы ўсёй сістэмы аховы здароўя Магілёўскай вобласці, застаецца недаўкамплектаванасць медыцынскіх устаноў лекарамі розных спецыяльнасцяў, паведамляе Генеральная пракуратура са спасылкай на прэс-службу рэгіянальнай пракуратуры.
Праверка ўстаноў аховы здароўя паказала, што “арганізацыямі аховы здароўя прыняты меры па ліквідацыі раней выяўленых парушэнняў”, аднак на працы сістэмы негатыўна адбіваюцца асобныя парушэнні.
Падчас праверкі пракуроры выявілі звыш 50 фактаў парушэнняў парадку правядзення дыспансерызацыі дарослага насельніцтва.
Ва ўстановах аховы здароўя Магілёва, Асіповіцкага і Слаўгарадскага раёнаў устаноўленыя факты парушэння тэрмінаў чакання медыцынскіх паслуг і дыягнастычных даследаванняў.
Па-ранейшаму фіксуюцца парушэнні, звязаныя з выкарыстаннем вакцын, вядзеннем часопісаў уліку прафілактычных прышчэпак, адзначае нагляднае ведамства.
У шэрагу выпадкаў ва ўстановах аховы здароўя адсутнічалі абавязковыя лекавыя сродкі, кантроль тэрмінаў іх захоўвання ажыццяўляўся неналежным чынам.
Асаблівую ўвагу падчас праверкі пракуроры надалі фельчарска-акушэрскім пунктам (ФАП), ад працы якіх залежыць якасць медыцынскага абслугоўвання сельскага насельніцтва.
Органы пракуратуры вобласці праверылі больш за 120 пунктаў, або 50% іх агульнай колькасці. Парушэнні санітарна-тэхнічнага стану ўстаноўлены ў 12 ФАПах.
Па выніках праверкі першы намеснік пракурора Магілёўскай вобласці ўнёс прадстаўленне ў аблвыканкам, у якім запатрабаваў ліквідаваць парушэнні заканадаўства ў сферы аховы здароўя.
У Рэспубліканскім банку вакансій на 20 студзеня ў Магілёўскай вобласці было 295 вакансій лекараў-спецыялістаў. Агулам у Беларусі 2.618 вакансій лекараў-спецыялістаў, на 11 чэрвеня 2025 года іх было 2.833, на канец студзеня 2025 года — больш за 4,3 тыс., на 14 чэрвеня 2024 года — амаль 5 тыс.
Пасля 2020 года з рэпрэсіямі ў Беларусі сутыкнуліся ў тым ліку медыкі. Многія з іх актыўна ўдзельнічалі ў пратэстах, выступаючы супраць гвалту над людзьмі. Кіраўніцтва бальніц звальняла нелаяльных, хоць сярод іх былі прадстаўнікі унікальных для краіны спецыялізацый.
У статыстычным аглядзе праваабарончага цэнтра “Вясна” за 2024 год паведамлялася пра 17 лекараў, якія знаходзяцца ў няволі. Дакладная колькасць медыкаў, якія пакінулі краіну або прафесію праз рэпрэсіі, невядомая.
