Для аднаўлення парушанага аварыяй узроўню ацяплення ў Мінску задзейнічаныя пікава-рэзервовыя кацельні

19 студзеня, Позірк. Пашкоджанне на цеплавой магістралі № 41, праз якое адбылося “зніжэнне параметраў цепланосбіта” ў шэрагу раёнаў сталіцы, “было хутка лакалізаванае”, заявіў 19 студзеня генеральны дырэктар “Мінскэнерга” Павел Гарудка.

“Разгорнутыя пікава-рэзервовыя кацельні па горадзе Мінску — у некалькіх раёнах, яны былі выведзены на ўласны контур і пачалі аператыўна распачынаць аднаўленне параметраў цепланосбіта — такіх, як ціск і тэмпература, — сказаў ён. — На гэты момант усе кацельні працуюць ва ўласным контуры, тэмпература цепланосбіта расце. Цягам бліжэйшай пары гадзін тэмпературны рэжым будзе адноўлены”.

За гадзіну да таго намеснік начальніка ўпраўлення гарадской гаспадаркі і энергетыкі — начальнік аддзела энергетыкі гэтага ўпраўлення Мінгарвыканкама Андрэй Садоўскі заявіў, што тэмпература цепланосбіта ў цепласяцях, паводле папярэдніх ацэнак, “на працягу пары гадзін” будзе ўзнятая “да нармаваных значэнняў”, “праблема будзе ліквідаваная”.

Пра аварыю на ўчастку цеплавой магістралі № 41 паведаміла раніцай 19 студзеня дзяржпрадпрыемства “Мінскэнерга”. Адзначалася, што праз гэта “адбылося зніжэнне тэмпературы цепланосбіта часткі спажыўцоў” у Фрунзенскім, Маскоўскім, Цэнтральным, Савецкім і Кастрычніцкім раёнах сталіцы.

Паводле прагнозу Белгідрамета, сёння ранкам у сталіцы чакаецца 17–19 градусаў марозу, удзень — 9–11, увечары — 14–16.