Ва ўборцы снегу на аўтадарогах занята больш за 400 спецыялістаў і 335 адзінак тэхнікі — Мінтранс
18 студзеня, Позірк. Расчыстка ад снегу аўтадарог агульнага карыстання і чыгуначных шляхоў “забяспечана ў поўным аб’ёме ва ўсіх рэгіёнах краіны”, паведамляе Міністэрства транспарту і камунікацый.
18 студзеня ва ўборцы снегу на аўтадарогах задзейнічана 335 адзінак спецтэхнікі і больш за 400 работнікаў дарожных арганізацый, адзначае ведамства.
Удакладняецца, што на рэспубліканскіх дарогах працуюць 173 адзінкі спецтэхнікі і 192 чалавекі, на мясцовых дарогах — 162 адзінкі спецтэхнікі і 235 чалавек.
“Паводле аператыўнай інфармацыі, ачышчана 100% рэспубліканскіх і мясцовых аўтамабільных дарог (15.935 км і 70.598 км адпаведна). Дарожнымі службамі праводзіцца таксама ачыстка абочын, аўтобусных прыпынкаў і пляцовак адпачынку ўздоўж трас”, — гаворыцца ў паведамленні.
Заяўляецца, што з 8 студзеня 2026 года “ва ўсіх абласцях рэспублікі для апрацоўкі праезнай часткі аўтадарог агульнага карыстання выдаткавана звыш 128 тыс. тон процігалалёдных матэрыялаў”.
“На сённяшні дзень цалкам расчышчаныя аб’екты чыгуначнай інфраструктуры — гэта 5.565 км чыгуначных шляхоў, 73 пасажырскія платформы вакзалаў і 1.433 платформы станцый і прыпыначных пунктаў”, — справаздачыліся ў Мінтрансе.
Халоднае надвор’е з перыядычнымі снегападамі захоўваецца ў Беларусі з 8 студзеня.
У ноч на 19 студзеня Белгідрамет прагназуе да 28 градусаў марозу, у наступныя дзве ночы — да 25.
