У Давосе Ціханоўская выступіць на дыскусіі аб расійскай эканоміцы ва ўмовах вайны і возьме ўдзел у закрытых сустрэчах

Апублікавана на адкрытай версіі “Позірку” 18 студзеня 2026 года ў 10:16

18 студзеня, Позірк. Святлана Ціханоўская выступіць на дыскусіі “Ці зможа Расія захаваць эканоміку ваеннага часу?”, якая пройдзе 21 студзеня ў Давосе (Швейцарыя) на Сусветным эканамічным форуме (СЭФ).

Згодна з анонсам дыскусіі, акрамя беларускага дэмакратычнага лідара спікерамі заяўленыя міністры замежных спраў Нідэрландаў Давід ван Вел і Румыніі Аана-Сільвія Цою, а таксама дырэктар Берлінскага цэнтра Карнегі па вывучэнні Расіі і Еўразіі Аляксандр Габуеў.

Удзельнікі абмяркуюць уплыў эканамічных санкцый на дзеянні РФ ва Украіне і яе знешнепалітычныя рашэнні, на бяспеку Еўропы.

На 22 студзеня, як паведаміў “Позірку“ галоўны дарадца Ціханоўскай Франак Вячорка, запланаваны яе ўдзел у двух закрытых нефармальных круглых сталах высокага ўзроўню “Новая эра геапалітычнай нявызначанасці“ і “Новая геапалітычная стратэгія Еўропы”.

У праграме знаходжання дэмлідара ў Давосе таксама ўдзел у мерапрыемствах, прысвечаных жаночаму лідарству. Яна заяўлена мадэратарам дыскусіі “Вера ў дзеянні: лідарства ў духу дыялогу”.

На СЭФ, які пройдзе з 19 па 23 студзеня, чакаецца выступ прэзідэнта ЗША Дональда Трампа.

Ціханоўская наведвала Давоскі форум у 2023, 2024 і 2025 гадах.