8 студзеня, Позірк. Аб правядзенні “доўгай і змястоўнай размовы” з экс-прэм’ерам Вялікабрытаніі (2019–2022) Борысам Джонсанам паведаміў 7 студзеня на сваёй старонцы ў “Фэйсбуку” дыпламатычны дарадца Святланы Ціханоўскай Дзяніс Кучынскі.
Паводле яго слоў, на сустрэчы гаворка ішла “пра тое, як падтрымаць Беларусь і Украіну і пра тое, чаму дэмакратыі павінны заставацца адзінымі ў супрацьстаянні аўтакратам”.
Кучынскі нагадаў, што ў 2021 годзе Джонсан “стаў першым у гісторыі Вялікабрытаніі прэм’ер-міністрам, які прыняў абранага прэзідэнта Беларусі [Святлану Ціханоўскую] на Даўнінг-стрыт, 10” (рэзідэнцыя брытанскага прэм’ера ў Лондане. — “Позірк”.).
“Гэта адважнае лідарства дапамагло ўмацаваць міжнароднае прызнанне дэмакратычных сіл Беларусі — і яго падтрымка з тых часоў не слабела”, — напісаў Кучынскі.
Ён таксама паведаміў, што ўручыў Джонсану ад імя Ціханоўскай “Камандны знак пашаны”.
У кастрычніку 2023 года Джонсан падчас візіту Ціханоўскай у Лондан паведаміў, што падтрымаў кампанію дэмакратычнага лідара “па прыцягненні ўвагі да праблемы палітычных зняволеных у Беларусі” і пагадзіўся стаць сімвалічным хросным яе мужа Сяргея Ціханоўскага, які знаходзіўся тады за кратамі.
“Прывітанне, сябры! Хачу звярнуць вашу ўвагу на лёс вельмі смелага чалавека. Сяргея Ціханоўскага, які па праву павінен быць абраным лідарам Беларусі, але замест гэтага ён пасаджаны ў турму карумпаваным тыранам, які кіруе гэтай краінай”, — заявіў тады Джонсан і заклікаў ахвотных далучацца да яго “акту салідарнасці”.
Палітык вядомы як адзін з ідэолагаў выхаду Вялікабрытаніі з Еўрапейскага саюза, з 2023 года пасля сыходу з парламента актыўнай палітычнай дзейнасцю не займаецца.
