Лукашэнка заявіў пра “прасяданне па прамысловасці” ў плане экспарту ў РФ

5 студзеня, Позірк. Рост экспарту ў Расію па выніках 2025 года склаў 2,5–3% пры плане 5%, вынікае з заявы Аляксандра Лукашэнкі 5 студзеня ў Мінску на сустрэчы з амбасадарам Беларусі ў РФ Аляксандрам Рагожнікам.

Палітык, словы якога прыводзіць яго прэс-служба, заявіў, што ўлады бачаць праблемы на расійскім кірунку, які з’яўляецца для Беларусі асноўным: “У нас прасяданне па прамысловасці. Ваша тэма, дарэчы, як былога міністра прамысловасці (былых жа не бывае)”.

Рагожнік адказаў, што амбасада па выніках 2025 года “не падвяла”. “Нягледзячы на ​​тое, што мы не дасягнулі росту ў 105%, які быў даведзены, разам з тым 102,3% за 11 месяцаў, на мой погляд, у цяперашніх умовах ахаладжэння расійскай эканомікі — выдатны вынік”, — сказаў амбасадар.

Лукашэнка пацікавіўся ў дыпламата пра прагрэс у плане стварэння новых сумесных з РФ вытворчасцей. “Гэта вельмі важна. Мы шмат гаворым цяпер пра станкабудаванне. Без яго ніякага развіцця быць не можа. А мы маем гэтую тэму. Зачын добры, школа існуе, кампетэнцыі. Мы кажам пра авіябудаванне, многае-многае, і ВПК у тым ліку. Што вы бачыце тут, якія недахопы?” — спытаў ён у Рагожніка.

Амбасадар, паводле слоў Лукашэнкі, прызнае, што Беларусі трэба нарошчваць сваю прысутнасць на расійскім рынку паслуг.

“Нешта мы там застопарыліся з лічбавым подпісам. Якія праблемы? Для нас гэта дзверы па многіх напрамках у Расійскай Федэрацыі. Тым больш што рашэнні быццам бы ўжо прынятыя. У чым тармажэнне? Пры сустрэчы з Уладзімірам Уладзіміравічам Пуціным мы абмяркуем гэтыя пытанні, калі там нехта тармозіць”, — заявіў ён.

Для Беларусі, паводле слоў Лукашэнкі, таксама вельмі важны праект будаўніцтва высакахуткаснай чыгуначнай магістралі Масква — Мінск і далей да Брэста. “Вы як прамысловец што бачыце тут? Рэальна гэта, нерэальна?” — запытаўся палітык у дыпламата.

На думку Лукашэнкі, “усходні, маскоўскі перш за ўсё” напрамак “вельмі запатрабаваны” ў беларусаў.