“Арэшнік” можа быць разгорнуты ў “лічаныя хвіліны”, але гэта “дастаткова інтымнае пытанне” — Муравейка
27 снежня, Позірк. “[Расійскі] комплекс “Арэшнік” знаходзіцца ў нас на тэрыторыі”, — заявіў начальнік Генеральнага штаба Узброеных сіл — першы намеснік міністра абароны Павел Муравейка ў інтэрв’ю тэлеканалу АНТ (паказана 26 снежня).
“Вызначаны раёны яго баявога патрулявання, праходзіць зладжванне баявых разлікаў і прывязка да геадэзічных каардынатаў для таго, каб можна было ажыццяўляць яго разгортванне і прымяненне. Усе гэтыя мерапрыемствы складаюць сабой комплекс работ па скарачэнні тэрміну пуску баявой ракеты”, — сказаў Муравейка.
Паводле яго, заступленне на баявое дзяжурства — гэта прывядзенне комплексу ў вышэйшую ступень гатоўнасці і змест яго “ў гатоўнасці да прымянення для выканання тых задач, якія будуць на яго ўскладзены”.
Адказваючы на пытанне, “які таймінг гэтага разгортвання”, начальнік Генштаба адзначыў: “Гэта дастаткова інтымнае пытанне з пункту гледжання прымянення ракетнай зброі. Яно бывае рознае, залежыць ад ступені гатоўнасці, ад іншых элементаў, але гэта лічаныя хвіліны”.
У інтэрв’ю “Першаму інфармацыйнаму” тэлеканалу, паказанаму ў той жа дзень, міністр абароны Віктар Хрэнін заявіў, што “апаненты” Мінска “Арэшнікам” “запалохваюць уласнае насельніцтва”:
“Працягваюць рабіць з нас вобраз ворага, распавядаюць што мы, як амерыканцы любяць казаць, дрэнныя хлопцы. Вось ёсць комплекс, і мы зараз нападзем. Гэтага ніколі не будзе. Але яны лічаць па-іншаму”.
Паводле яго, больш за год на тэрыторыі краіны размешчаная расейская тактычная ядзерная зброя: “Зусім нядаўна яна была абноўлена”.
Адначасова міністр заявіў, што Беларусі “дастаткова таго ўзбраення, якое ёсць“.
“Многія скептыкі кажуць, што яно савецкае, састарэлае. Нічога падобнага, яно добра ваюе. А калі трошкі дадаць мадэрнізацыі: добрых сродкаў сувязі, абароны, радыёэлектроннай барацьбы, беспілотнікі цяпер з’явіліся — гэта становіцца вельмі добрым комплексным ваенным ядром“, — сказаў Хрэнін.
Украіна перадасць партнёрам інфармацыю пра месцы размяшчэння "Арэшніка" ў Беларусі — Зяленскі
19 снежня, Позірк. Украіна ведае, дзе менавіта на тэрыторыі Беларусі плануецца размясціць расійскі комплекс "Арэшнік", і перадасць інфармацыю пра гэта сваім партнёрам, заявіў, паводле інфармацыі УНІАН, прэзідэнт Уладзімір Зяленскі 19 снежня падчас знаходжання з візітам у Варшаве. "Завяршаецца перамяшчэнне "Арэшніка" …
