Хрэнін далажыў Лукашэнку аб размяшчэнні “Арэшніка” ў Беларусі, Церцель — аб “прапановах ЗША” і кантактах з Польшчай
24 снежня, Позірк. Даклады старшыні Камітэта дзяржбяспекі Івана Церцеля і міністра абароны Віктара Хрэніна заслухаў 24 снежня Аляксандр Лукашэнка, паведамляе неафіцыйны тэлеграм-канал яго прэс-службы.
Хрэнін далажыў аб размяшчэнні ў Беларусі ракетнага комплексу “Арэшнік” і яго “пастаноўцы на баявое дзяжурства”.
У апублікаваным відэа, знятым у канферэнц-зале Мінабароны, Хрэнін заявіў, што гаворка таксама ішла аб далейшым развіцці ваеннага і ваенна-тэхнічнага супрацоўніцтва з Расіяй, у прыватнасці, у сферы ракетабудавання.
Паводле слоў кіраўніка ведамства, днямі былі зробленыя навучальныя пускі мадэрнізаванай айчыннай РСЗА “Паланэз-М” з павялічанай далёкасцю і палепшанай дакладнасцю стральбы. Ён адзначыў паспяховы вопыт мадэрнізацыі ЗРК “Бук”.
Церцель, як паведамляецца, справаздачыўся перад Лукашэнкам аб працы КДБ “па лініі выведкі і контрвыведкі”, абстаноўцы ў Беларусі напярэдадні калядных і навагодніх святаў.
Абмяркоўваўся працяг працы “па лініі спецслужбаў у рамках беларуска-амерыканскіх кантактаў”. Гаворка, у прыватнасці, ішла як аб “канкрэтных кроках і садзейнічанні беларускага боку ў вырашэнні пытанняў гуманітарнага характару ў канфлікце Расіі і Украіны”, а таксама аб “новых прапановах ЗША на перамоўным трэку”.
Акрамя таго, кіраўнік КДБ далажыў аб сітуацыі на беларуска-літоўскай мяжы, у тым ліку “ў сувязі з інцыдэнтамі з паветранымі шарамі”.
“Нягледзячы на спробы Вільнюса перанесці гэтае пытанне ў палітычную плоскасць, беларускі бок па-ранейшаму адкрыты да канструктыўнага ўзаемадзеяння і перамоваў у пытаннях памежнага супрацоўніцтва і не толькі”, — гаворыцца ў паведамленні.
Церцель таксама далажыў “аб кантактах па лініі спецслужбаў у напрамку вырашэння найбольш вострых праблем”, якія існуюць паміж Беларуссю і Польшчай.
13 снежня 2025 года ў рамках дамоўленасцяў паміж Мінскам і Вашынгтонам Лукашэнка вызваліў 123 чалавекі (110 грамадзян Беларусі і 13 замежнікаў) з умовай іх наступнага ад’езду з краіны.
109 беларусаў і пяць украінцаў прыбылі на тэрыторыю Украіны. Яшчэ адзін палітвязень, лаўрэат Нобелеўскай прэміі міру, кіраўнік праваабарончага цэнтра “Вясна” Алесь Бяляцкі быў высланы ў Літву.
Вялікая група з 89 беларускіх палітвязняў у ноч на 18 снежня прыбыла з Украіны ў Варшаву. Двое з іх — палітыкі Віктар Бабарыка і Марыя Калеснікава — з Польшчы накіраваліся ў Геманію.
19 снежня Хрэнін заявіў на палях Усебеларускага народнага сходу (УНС), што пасля таго як расійскі ракетны комплекс “Арэшнік” заступіць у Беларусі на баявое дзяжурства, яго пакажуць журналістам.
Пра тое, “Арэшнік” завезены ў Беларусь, заявіў 18 снежня Аляксандр Лукашэнка, выступаючы на УНС. “Ён у нас з учорашняга дня і заступае на баявое дзяжурства”, — сказаў ён.
Інфармацыя аб размяшчэнні ў Беларусі расійскага ракетнага комплексу “Арэшнік” з’яўляецца “прапагандай страху для Еўропы выключна”, заявіў кіраўнік Цэнтра ў супрацьдзеянні дэзінфармацыі пры Радзе нацыянальнай бяспекі і абароны Украіны Андрэй Каваленка.
“Гэтая зброя носіць выключна інфармацыйны характар”, — падкрэсліў ён.
13 снежня кіраўнік Службы замежнай выведкі Украіны Алег Івашчанка заявіў, што калі “Арэшнік” з’явіцца ў Беларусі, Мінск “не будзе мець ніякіх правоў і паўнамоцтваў на яго прымяненне”, комплекс будзе знаходзіцца “ў адзінай сістэме кіравання ракетных войскаў стратэгічнага прызначэння РФ”.
Пра тое, што размяшчэнне “Арэшніка” ў Беларусі ўяўляе небяспеку для Еўропы, у канцы кастрычніка заяўляў прэзідэнт Украіны Уладзімір Зяленскі.
12–16 верасня прайшлі маштабныя беларуска-расійскія вучэнні “Захад-2025”, падчас якіх былі адпрацаваныя “планаванне ўжывання” ядзернай зброі і комплексу “Арэшнік”, а таксама супрацьпаветраная абарона, абарончыя баявыя дзеянні, падтрымка тактычнай авіяцыі і інш.
Па выніках пасяджэння Вышэйшага дзяржсавета Саюзнай дзяржавы, якое адбылося 6 снежня 2024 года, Масква і Мінск зацвердзілі агульную канцэпцыю бяспекі і заключылі міждзяржаўны дагавор аб гарантыях бяспекі. Лукашэнка пасля пасяджэння заявіў, што папрасіў Пуціна размясціць у Беларусі расійскія балістычныя ракеты сярэдняй далёкасці “Арэшнік”. Пуцін адзначыў, што гэты ракетны комплекс можна будзе размясціць на беларускай тэрыторыі ў другой палове 2025 года.
26 студзеня 2025-га Лукашэнка заявіў журналістам, што “Арэшнік” будзе дастаўлены ў Беларусь “з дня на дзень”. Пры гэтым, кажучы аб тэрмінах пастаўкі, ён паведаміў, што “гэта не гарыць”.
Паводле слоў Лукашэнкі, ён “пажартаваў”, калі раней заяўляў пра неабходнасць размясціць у Беларусі 10 такіх ракетных комплексаў. Пуцін зрабіў яму на гэты конт “заўвагу”, бо Расія не абяцала такую колькасць гэтага ўзбраення, дадаў палітык.
14 сакавіка, выступаючы ў Савеце федэрацыі РФ, Лукашэнка сярод іншага заявіў, што Масква перадасць Беларусі некалькі ракетных комплексаў “Арэшнік” да канца года. Пускавыя ўстаноўкі да ракетнага комплексу, адзначыў ён, вырабляюць у Беларусі.
18 сакавіка гэтага года дзяржсакратар Савета бяспекі Аляксандр Вальфовіч заявіў, што ў краіне падрыхтаваныя пляцоўкі для размяшчэння “Арэшніка”.
Упершыню аб жаданні размясціць “Арэшнік” на тэрыторыі Беларусі Лукашэнка заявіў 28 лістапада 2024 года на палях саміту АДКБ у Астане (Казахстан).
У Беларусі засталася "нязначная колькасць" літоўскіх грузавікоў — прэм'ер Літвы
23 снежня, Позірк. Паводле наяўнай у літоўскага ўрада інфармацыі, значная колькасць раней затрыманых у Беларусі грузавых аўтамабіляў ужо працягвае працаваць, курсіруючы паміж краінамі, заявіла журналістам 23 снежня прэм'ер-міністр Літвы Інга Ругінене. "Невялікая колькасць усё яшчэ знаходзіцца ў Беларусі, мы працуем …
