31 жыхар пацярпелага ад выбуху гомельскага шматпавярховіка пражывае ў гатэлі

24 снежня, Позірк. 31 жыхар пацярпелага ад выбуху шматкватэрнага дома па вуліцы Косарава зараз пажывае ў гасцініцы “Сож”, паведамляецца ў тэлеграм-канале старшыні Гомельскага гарвыканкама Уладзіміра Прывалава.

“Чырвоны Крыж дапамагае грамадзянам, якія звярнуліся па прадметы асабістага ўжытку. Медыцынскія работнікі аказваюць неабходную дапамогу тым, хто звярнуўся па накіраванне ва ўстановы аховы здароўя”, — гаворыцца ў паведамленні.

Адзначаецца, што пасля завяршэння “ўсіх неабходных демонтажных мерапрыемстваў у трэцім пад’ездзе” жыхары першага і другога пад’ездаў пацярпелага дома “змогуць вярнуцца ў свае кватэры”. Таксама гэта змогуць зрабіць “жыхары шостага пад’езда суседняга дома № 5”.

“На гэты момант з левага боку трэцяга пад’езда адноўленае ацяпленне і функцыянуе каналізацыя, што выключае рызыку прамярзання”, — паведамляецца ў тэлеграм-канале.

Падкрэсліваецца, што жыхарам дома кампенсуецца шкода: “Ужо зробленыя першыя выплаты па заключаных страхавых дагаворах”.

“Ні адна сям’я і ні адзін чалавек не застануцца без увагі — усім будзе аказана неабходная дапамога і падтрымка”, — адзначаецца ў паведамленні.

Напярэдадні стала вядома аб выяўленні ў 21:30 22 снежня пад абвалам перакрыццяў двух паверхаў у доме па вуліцы Косарава цела загінулай у выніку выбуху 17 снежня жанчыны.

Намеснік старшыні Гомельскага аблвыканкама Андрэй Бараноўскі адзначыў, што цела было знойдзена пры разборы завалаў. Паводле папярэдняй інфармацыі, загінулай з’яўляецца жыхарка дома.

Адзначалася, што ўпраўленнем Следчага камітэта па Гомельскай вобласці працягваецца праца па выяўленні ўсіх абставін інцыдэнту, прычын і ўмоў, якія прывялі да трагедыі. Прызначаны неабходныя экспертныя даследаванні. Прававая ацэнка таго, што адбылося, будзе дадзена пасля правядзення комплексу следчых дзеянняў.

Таксама Бараноўскі паведаміў, што “спецыялісты ў доме па вуліцы Косарава правялі неабходныя дэмантажныя работы”: “Устаноўлена, што дадатковых канструкцый не пашкоджана. Камісіяй прынята рашэнне па аднаўленні ў найкарацейшыя тэрміны будынка да першапачатковага стану, распрацоўваецца алгарытм дзеянняў”.

Пра “выбух газапаветранай сумесі” ў кватэры на 7-м паверсе 10-павярховага дома (вул. Косарава, 3) у Гомелі ў дзень здарэння паведаміла Міністэрства па надзвычайных сітуацыях. Пазней ведамства заявіла, што ў выніку выбуху “адбылося абрушэнне пліт перакрыццяў жылых пакояў з восьмага па шосты паверхі, пашкоджана вонкавая сценавая панэль дома”.

Бараноўскі ў той жа дзень паведаміў, што ў пад’ездзе, у адной з кватэр якога адбыўся выбух, “пражывала 78 чалавек, з іх 11 дзяцей”.

“Чатыры прадстаўнікі сталага ўзросту, якім урачамі прадпісаны пасцельны рэжым, прыняты нашымі медыкамі, для іх арганізуюць асобы догляд. Маюць патрэбу Жыхарам, якія маюць патрэбу, прадстаўлены месцы для часовага пражывання, арганізавана харчаванне. Асноўная задача на сённяшні дзень — супакоіць людзей, каб у гэтай складанай сітуацыі яны пачуваліся камфортна”, — заявіў тады чыноўнік.

З таго часу пра пацярпелых ні ведамствы, ні дзяржаўныя СМІ не паведамлялі.