Анджэй Пачобут узнагароджаны прэміяй “Абаронца правоў чалавека 2025 года” Заходне-Паморскага ваяводства Польшчы
Анджэй Пачобут
10 снежня, Позірк. Палітвязень, журналіст і актывіст неафіцыйнага Саюза палякаў Беларусі Анджэй Пачобут “за мужнасць і стойкасць“ удастоены прэміі “Абаронца правоў чалавека 2025 года“, заснаванай Заходне-Паморскім ваяводствам Польшчы. Пра гэта паведамляе ўпраўленне маршала (кіраўніка) гэтай адміністрацыйна-тэрытарыяльнай адзінкі.
Узнагарода была ўручаная 10 снежня, у Міжнародны дзень абароны правоў чалавека, у канцылярыі маршала.
Ад імя лаўрэата яе прыняў Барташ Веліньскі, намеснік галоўнага рэдактара “Газеты Выборчай”, карэспандэнтам якой быў Пачобут. Паведамляецца, што статуэтку, якая сімвалізуе зламаныя кайданы, уручыла яму намеснік маршала Ганна Банькоўска.
“У нашых вачах непахіснасць Анджэя Пачобута можа здацца самагубчай і самаразбуральнай. Але я думаю, што для Анджэя, вялікага рамантычнага ідэаліста, іншага шляху не было. Уцёкі і падпарадкаванне Лукашэнку азначала б здраду ўсяго, У што верыць Анджэй. А ён верыць — таму што казаў і пісаў пра гэта — у незалежную, свабодную Беларусь, укаранёную ў Еўропе. Пачобут таксама верыць у свабоду журналістыкі. Як польскі журналіст я магу шмат што сказаць з гэтай нагоды. Восем гадоў мы змагаліся за незалежнасць нашых рэдакцый і годнасць нашай прафесіі, пратэстуючы ў абарону СМІ, якія ўрад хацеў захапіць ці ўжо захапіў. Але ніхто з нас не заплаціў за свабоду слова тую цану, якую заплаціў і працягвае плаціць Анджэй. Для нас расплата, з якой сутыкнуўся Пачобут, проста няўяўная”, — сказаў Веліньскі, прымаючы ўзнагароду.
У матэрыяле адзначаецца, што Пачобут быў карэспандэнтам “Газеты Выборчай“ з 2006 года. Там ён “смела дакументаваў і асвятляў падзеі ў сваёй краіне, часта становячыся аб’ектам рэпрэсій з боку беларускіх уладаў”. Яго артыкулы, якія “раскрываюць палітычную рэальнасць”, спрыялі “павышэнню міжнароднай дасведчанасці аб складанай сітуацыі ў Беларусі”.
Узнагарода ад імя маршала Заходне-Паморскага ваяводства з 2021 года прысуджаецца асобе (або групе асоб) за іх жыццёвую пазіцыю і актыўныя намаганні па прасоўванні і забеспячэнні правоў чалавека.
16 снежня ў Еўрапарламенце дачцэ Анджэя Пачобута будзе ўручаная прысуджаная журналісту прэмія “За свабоду думкі” імя Сахарава.
8 лютага 2023 года Гродзенскі абласны суд прыгаварыў Пачобута да 8 гадоў пазбаўлення волі ў калоніі ва ўмовах узмоцненага рэжыму. Суддзя Дзмітрый Бубенчык прызнаў яго вінаватым паводле ч. 3 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) і ч. 3 арт. 361 (заклікі да захадаў абмежавальнага характару (санкцый), накіраваных на прычыненне шкоды нацыянальнай бяспецы) Крымінальнага кодэкса.
Пасля рашэння суда, 10 лютага 2023 года, Польшча закрыла адзін з двух даступных на той момант для падарожнікаў пунктаў пропуску — Баброўнікі (з беларускага боку Бераставіца), які аднавіў працу сёлета 17 лістапада.
