Названыя лаўрэаты прэміі праваабарончай супольнасці за 2025 год
10 снежня, Позірк. Лаўрэатамі прэміі праваабарончай супольнасці за дасягненні ў галіне правоў чалавека ў намінацыі “Праваабаронца года“ ў 2025 годзе сталі праваабаронцы Павел Левінаў, Алена Маслюкова і кіраўнік Беларускага ПЭНа Таццяна Нядбай.
Адпаведная прэмія была ўручаная ім на цырымоніі ў Вільнюсе 10 снежня — у Міжнародны дзень абароны правоў чалавека.
Як было адзначана на мерапрыемстве, упершыню з часу заснавання прэміі ўсе тры намінанты, якія ўвайшлі ў шорт-ліст, набралі аднолькавую колькасць галасоў членаў журы.
У намінацыі “Журналіст года“ прэмія была ўручаная Кацярыне Абромчык (ПЦ “Вясна“). Праваабарончай кампаніяй / ініцыятывай года прызнаная кампанія “У турмы не жаночы твар”. Прэмія ў намінацыі “Праваабарончая салідарнасць“ прысуджана палітзняволенай, лідару незалежнага прафсаюза наваполацкага “Нафтана“ (Віцебская вобласць) Вользе Брыцікавай.
Праваабарончая прэмія за дасягненні ў галіне правоў чалавека заснаваная “Праваабарончым альянсам” у 2008 годзе. Да 2020 года ўручалася ў Беларусі, цяпер — за мяжой.
