Пачата спецвытворчасць у дачыненні да гамяльчаніна Алега Хараўца за рабаванне і махлярства

10 снежня, Позірк. Аб пачатку 9 снежня спецыяльнай вытворчасці ў дачыненні да 47-гадовага гамяльчаніна Алега Хараўца паведамляецца ў спецыялізаваным тэлеграм-канале Следчага камітэта.

Яго абвінавачваюць паводле ч. 4 арт. 206 (рабаванне) і ч.ч. 3 і 4 ст. 209 (махлярства) Крымінальнага кодэкса.

СК прапануе Хараўцу з’явіцца ў сваё гомельскае ўпраўленне.

Мужчына быў аб’яўлены ў вышук у ліпені 2015 года. Раней СМІ паведамлялі, што ён знаходзіцца на тэрыторыі Ўкраіны.

У 2022 годзе Офіс Генеральнага пракурора Украіны вынес пастанову аб выдачы Хараўца Мінску, але ён і яго адвакат абскардзілі рашэнне. Працэс экстрадыцыі стаў немагчымы, бо Кіеў да гэтага часу выйшаў з Канвенцыі аб прававой дапамозе і прававых адносінах па грамадзянскіх, сямейных і крымінальных справах 1993 года, якой рэгуляваліся адносіны паміж Украінай і Беларуссю, у тым ліку наконт вышуку і выдачы злачынцаў.

Пазней яго двойчы затрымлівалі і штрафавалі за пазапраўнае знаходжанне ў краіне, штрафы ён аплачваў. Аказалася, што адзіным дакументам у яго на руках быў пашпарт грамадзяніна Беларусі, тэрмін дзеяння якога скончыўся ў маі 2023 года.

На гэтай падставе ў красавіку 2024-га міграцыйная служба адправіла гамяльчаніна ў пункт часовага знаходжання замежных грамадзян і звярнулася ў Прыморскі раённы суд Адэсы з іскам аб затрыманні Хараўца “з мэтай ідэнтыфікацыі і забеспячэнні выправаджэння за межы тэрыторыі Украіны”. Суд у задавальненні іску адмовіў.

Спецвытворчасць — гэта вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс.

Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый і інш.

Улады актыўна выкарыстоўваюць спецвытворчасць для абвінавачання, правядзення судоў і канфіскацыі па іх вырашэнні ўласнасці фігурантаў, якія знаходзяцца за мяжой.