Урад зацвердзіў парадак псіхалагічнага сумоўя з педагогамі
9 снежня, Позірк. Патэнцыйныя беларускія педагогі перад прыёмам на працу могуць праходзіць псіхалагічны сумоўе. Таксама такое сумоўе можа праводзіцца для дзеючых педагагічных работнікаў. Пра гэта гаворыцца ў размешчанай 9 снежня на Нацыянальным прававым інтэрнэт-партале пастанове ўрада.
Прадугледжана, у прыватнасці, правядзенне наймальнікамі, юрыдычнымі асобамі, індывідуальнымі прадпрымальнікамі псіхалагічнага сумоўя з “фізічнымі асобамі, якія плануюць ажыццяўляць або ажыццяўляюць педагагічную дзейнасць, педагагічную дзейнасць у сферы фізічнай культуры і спорту, а таксама прэтэндэнтамі на заняцце пасад служачых, звязаных з выкананнем выхаваўчых функцый, іншых пасад служачых, прафесій рабочых, звязаных з пастаяннай працай з дзецьмі, або тымі, хто займае такія пасады”.
Пастановай рэгламентуюцца выпадкі, калі наймальнік мае права прыняць рашэнне аб арганізацыі і правядзенні такога сумоўя. Гэта, у прыватнасці, паступленне ў дачыненні да згаданай асобы “характарыстыкі з папярэдняга месца працы (вучобы), якая змяшчае інфармацыю аб адмоўных маральных якасцях кандыдата”.
Падставай для сумоўя можа паслужыць “паступленне ад грамадзян, дзяржаўных органаў, іншых арганізацый інфармацыі, якая адмоўна характарызуе прафесійныя, дзелавыя, маральныя якасці” педагога або патэнцыйнага педагога, а таксама правядзенне ў дачыненні да яго сям’і сацыяльнага расследавання.
Гутаркі будуць праводзіць “дзяржаўныя арганізацыі, у штатным раскладзе якіх прадугледжана пасада псіхолага або педагога-псіхолага“. Пры гэтым агаворваецца, што адпаведныя заключэнні па іх выніках будуць насіць рэкамендацыйны характар.
Пасля падзей 2020 года сфера адукацыі зведала значныя змены. У навучальных праграмах сярэдняй школы істотна вырас ідэалагічны складнік, у дзецях выхоўваецца лаяльнасць да ўлады. Пры гэтым у педагагічнай галіне былі праведзеныя кадравыя чысткі, масава звальняліся настаўнікі, якія не падтрымліваюць Аляксандра Лукашэнку, якія аддалі подпіс за іншых кандыдатаў падчас прэзідэнцкай кампаніі-2020.
Паводле слоў дарадцы Святланы Ціханоўскай па навуцы і адукацыі Паўла Церашковіча, больш за 6 тыс. настаўнікаў пазбавілася працы з-за рэпрэсій, звыш 50 чалавек прайшло “праз пекла катаванняў у калоніях і на “хіміі” (абмежаванне волі. —“Позірк”.), некаторыя і цяпер знаходзяцца за кратамі”.
Сёлета ўлетку ў Беларусі былі прынятыя папраўкі ў закон аб забеспячэнні правоў дзяцей, якія сярод іншага прадугледжваюць пазбаўленне права займацца педагагічнай дзейнасцю асоб, якія “ўчынілі злачынствы экстрэмісцкай накіраванасці”. Лукашэнка падпісаў адпаведны дакумент 12 ліпеня.
“Экстрэмісцкія” артыкулы Крымінальнага кодэкса пасля падзей 2020 года актыўна выкарыстоўваюцца ўладамі для палітычнага пераследу грамадзян.
