З восені зафіксаваны 191 выпадак махлярства пры афармленні віз або набыцці тураў — Нацбанк
8 снежня, Позірк. З 1 верасня аўтаматызаваная сістэма Нацыянальнага банка зафіксавала 191 выпадак махлярства пры афармленні віз або набыцці экспрэс-тураў, паведаміла 8 снежня прэс-служба рэгулятара.
Адзначаецца, што агульная сума шкоды склала 188 тыс. рублёў.
“Махляры ў сацыяльных сетках размяшчаюць павабныя прапановы па афармленні віз або продажы экспрэс-тураў за мяжу, — патлумачыў схему Нацбанк. — Пад выглядам менеджара або агента з “кліентам” звязваецца зламыснік і пераконвае пад рознымі падставамі ўнесці перадаплату (аплаціць візавы збор, страхоўку, квіткі і г.д.). а візу ці пуцёўку ахвяра так і не атрымлівае”.
На гэтым фоне рэгулятар заклікае дбайна правяраць тураператара ці візавае агенцтва, у якое плануецца звярнуцца.
“Пераканайцеся ў наяўнасці фізічнага офіса арганізацыі. Ніколі не пераводзьце грошы на банкаўскую карту фізічнай асобы або на чужы крыптагаманец”, — рэкамендаваў Нацбанк.
