Кіраўніца еўрапейскай дыпламатыі з трыбуны АБСЕ заклікала беларускія ўлады спыніць рэпрэсіі

4 снежня, Позірк. Еўрапейскі саюз “працягвае заклікаць беларускія ўлады спыніць <…> рэпрэсіі, вызваліць усіх палітычных зняволеных і выконваць свае міжнародныя абавязацельствы ў галіне правоў чалавека”. З такой заявай выступіла на 32-м пасяджэнні Савета міністраў замежных спраў краін — удзельніц АБСЕ ў Вене вярхоўны прадстаўнік Еўрасаюза па замежных справах і палітыцы бяспекі Кая Калас.

“ЕС заклікае Беларусь спыніць падтрымку агрэсіўнай вайны Расіі супраць Украіны”, — дадала яна.

У працы паседжання бярэ ўдзел беларускі дэмакратычны лідар Святлана Ціханоўская. На палях сустрэчы 4 снежня запланавана правядзенне мерапрыемства “Падрыхтоўка да дэмакратычнай будучыні Беларусі”, арганізатарам якога выступіла група “сяброў дэмакратычнай Беларусі” ў АБСЕ.

Афіцыйны Менск на паседжанні прадстаўляе намеснік міністра замежных спраў Ігар Сакрэта. Інфармацыю аб яго ўдзеле ў сустрэчы прэс-служба МЗС суправадзіла каментаром: “Беларусь паслядоўна выступае за захаванне шматбаковага дыялогу, умацаванне даверу і пошук практычных рашэнняў у сферы еўрапейскай бяспекі”.