Долар патаннеў на першых снежаньскіх таргах — да ўзроўню сярэдзіны траўня 2023 года

1 снежня, Позірк. Амерыканская, агульная еўрапейская, а таксама кітайская валюты патаннелі на таргах Беларускай валютна-фондавай біржы 1 снежня.

Курс долара знізіўся да 2,9016 рубля (-0,25%; -0,0073). На супастаўным узроўні ён гандляваўся 16 траўня 2023 года, калі вырас з 2,8906 да 2,9174 рубля (+0,0268; +0,93%).

Юань патаннеў да 4,0972 за 10 (-0,09%; -0,0072), еўра — да 3,3672 (-0,96%; -0,0327).

Каціроўка расійскага рубля вырасла да 3,7301 за 100 (+0,36%; +0,0133).

На мінулым працоўным тыдні (24–28 лістапада) каціроўка еўра знізілася на 0,57% (з 3,4194 да 3,3999), долара — на 0,43% (з 2,9214 да 2,9089); расійскага рубля — вырасла на 0,59% (з 3,6949 да 3,7168 за 100), юаня — на 0,26% (з 4,0901 да 4,1009 за 10).

Афіцыйны курс долара ў Беларусі за 11 месяцаў 2025 года знізіўся на 16,07% (з 3,4735 да 2,9153 рубля) — гэта другі паказчык на тэрыторыі былога СССР, сведчыць праведзены “Позіркам” параўнальны аналіз каціровак цэнтрабанкаў на 31 снежня 2024 года і 30 лістапада 2025-га (па выніках студзеня, студзеня — лютага, студзеня — сакавіка, студзеня — красавіка, студзеня — траўня, студзеня — чэрвеня, студзеня — ліпеня, студзеня — жніўня было другое месца, -1,73%, -8,54%, -10,25%, -12,16%, -13,7%, -14,6%, -12,97%, -14,3% адпаведна; студзеня — верасня і студзеня — кастрычніка — трэцяе — 12,92% і 14,29% адпаведна).

У 2024 годзе афіцыйны курс долара ў Беларусі вырас на 9,32% (з 3,1775 да 3,4735 рубля). Гэта чацвёрты паказчык на тэрыторыі былога СССР.