Лукашэнка распачаў перагаворы з султанам Амана на чацвёрты дзень знаходжання ў гэтай краіне

1 снежня, Позірк. Перагаворы Аляксандра Лукашэнкі з султанам Амана Хайсамам бін Тарыкам аль Саідам праходзяць 1 снежня ў доме кіраўніка гэтай краіны на Аравійскім паўвостраве, вынікае з інфармацыі неафіцыйнага тэлеграм-канала прэс-службы беларускага госця.

Як сцвярджаецца, тое, што сустрэча праходзіць “не ў афіцыйных залах, а дома ў султана”, — гэта “па-сапраўднаму выключны” фармат. “Жэст, які ў дыпламатыі кажа пра давер, павагу і асаблівыя стасункі да высокага госця”, — гаворыцца ў паведамленні.

Паводле інфармацыі гэтага рэсурсу, Лукашэнка і Хайсам бін Тарык аль Саід падчас перагавораў, якія праходзяць за зачыненымі дзвярыма, “абмяркуюць рэалізацыю ўжо дасягнутых дамоўленасцей, дарожную карту кастрычніка 2025 года і новыя сумесныя праекты ў прамысловасці, лагістыцы, інвестыцыях і высокіх тэхналогіях”.

Мяркуючы з апублікаванай фатаграфіі, як мінімум на пратакольнай частцы сустрэчы прысутнічалі сыны Лукашэнкі — Віктар і Мікалай.

Лукашэнка прыбыў у Аман увечары 28 лістапада. З тых, як адзначаў “Позірк”, пра яго знаходжанне ў краіне нічога не паведамлялася.