У “спіс экстрэмістаў” дададзены 23 чалавекі

28 лістапада, Позірк. У спіс “асоб, датычных да экстрэмісцкай дзейнасці”, дададзена яшчэ 23 чалавекі. Цяпер у размешчаным на сайце Міністэрства ўнутраных спраў пераліку 6.042 пазіцыі.

Сярод тых, хто папоўніў спіс, няма асоб, якіх на сайце праваабарончага цэнтра “Вясна” адносяць да палітвязняў.

З пазнакай “адбывае пакаранне” ў спіс унесеныя Аляксей Кердоль (асуджаны па арт. 16, 130 і 342 Крымінальнага кодэкса), Уладзімір Янкоўскі, Аляксей Ягела (абодва — арт. 361⁴), Дзмітрый Карасёў (арт. 130), Дзмітрый Касенка, Ілля Бакіноўскі (абодва — арт. 361³), Аляксандра Дуброўская і Марына Храмцова (абедзве — арт. 361¹).

15 чалавек фігуруюць у спісе з пазнакай “судзімасць не пагашана”, што, як правіла, сведчыць аб вынясенні пакарання, не звязанага з пазбаўленнем волі. Гэта Аляксей Друпаў, Маргарыта Ясевіч, Аляксандр Русаковіч, Сяргей Бай, Юлія Папкова, Дзмітрый Едчык, Сяргей Казлоў, Ігар Раманенка, Яўген Іванчык, Вадзім Мельнічук, Аляксей Краўцоў, Пётр Лапо, Сяргей Сапуноў (усе асуджаныя паводле арт. 361⁴), Раман Юркоў (арт. 130), Наталля Гірс (арт. 361²).

Даведка “Позірку”:

арт. 16 — саўдзел у злачынстве;

арт. 130 — распальванне расавай, нацыянальнай, рэлігійнай або іншай сацыяльнай варожасці ці варажнечы;

арт. 342 — арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх;

арт. 361¹ — стварэнне экстрэмісцкага фарміравання або ўдзел у ім;

арт. 361² — фінансаванне экстрэмісцкай дзейнасці;

арт. 361³ — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка або падрыхтоўка асоб да такога ўдзелу;

арт. 361⁴ — садзейнічанне экстрэмісцкай дзейнасці.