Лукашэнка змяніў шэраг рэктараў ВНУ, кіраўнікоў райвыканкамаў, гендырэктара МТЗ

20 лістапада, Позірк. Прызначэнні на кіроўныя пасады ў некаторых ВНУ, мясцовых органах улады і адным прадпрыемстве зрабіў 20 лістапада Аляксандр Лукашэнка.

Паводле інфармацыі прэс-службы палітыка, рэктарам Беларускага дзяржаўнага тэхналагічнага ўніверсітэта стаў Сяргей Каспяровіч. Раней ён узначальваў Брэсцкі дзяржаўны тэхнічны ўніверсітэт.

Пасаду рэктара Магілёўскага дзяржаўнага ўніверсітэта імя А. А. Куляшова заняў Юрый Машын (раней — першы прарэктар Беларуска-Расійскага ўніверсітэта).

Генеральным дырэктарам Мінскага трактарнага завода прызначаны Тарас Мурог (у 2020 годзе займаў пасаду першага намесніка гендырэктара прадпрыемства, пасля — кіраўніка “БМК Холдынг”).

Дзяржаўны камітэт па навуцы і тэхналогіях (ДКНТ) узначаліў Дзяніс Каржыцкі, які дагэтуль быў першым намеснікам старшыні ДКНТ.

Старшынёй Краснапольскага раёна стаў Аляксандр Яфімчыкаў, Асіповіцкага — Геворг Мелканян, Хоцімскага — Аляксандр Дзівакоў (усе ў Магілёўскай вобласці); Ушацкага — Сяргей Шамовіч, Шумілінскага — Мікалай Будневіч (усе ў Віцебскай вобласці); Валожынскага — Віталь Бычкоўскі (у Мінскай вобласці).

Акрамя таго, Лукашэнка ўзгадніў прызначэнне Наталлі Васілеўскай на пасаду першага намесніка кіраўніка Мінстэрства антыманапольнага рэгулявання і гандлю (МАРГ), Алега Дзікуна — на пасаду намесніка міністра МАРГ.