У Смаленскай вобласці прадухілены ўвоз з Беларусі “шпіка невядомага паходжання” з падробленымі дакументамі

30 кастрычніка, Позірк. Аб прадухіленні ўвозу ў Расію з Беларусі “шпіка невядомага паходжання“ паведаміла 30 кастрычніка Федэральная служба па ветэрынарным і фітасанітарным наглядзе (Рассельгаснагляд).

Адзначаецца, што 28 кастрычніка ў Смаленскай вобласці пры даглядзе затрыманага раней грузавога транспартнага сродку, які рухаўся з Беларусі, упраўленне Рассельгаснагляду па Бранскай, Смаленскай і Калужскай абласцях выявіла нелегальную перавозку замарожанага свінога тлушчу.

Паводле наяўных суправаджальных дакументаў, прадукцыя “тлушч свіны замарожаны на скуры“ агульнай вагой 22,5 тоны перавозілася з Мінска, месцам выгрузкі значылася Іванава, а вытворцам было пазначана беларускае мясаперапрацоўчае прадпрыемства.

Аднак ветэрынарныя інспектары службы выявілі падроблены штамп уліку грузаў, што паступаюць, “Груз улічаны” з подпісам неіснуючага супрацоўніка ўпраўлення Рассельгаснагляду.

Акрамя таго, пры вывучэнні ветэрынарнага сертыфіката было ўстаноўлена, што ён таксама мае прыкметы падробкі і не зарэгістраваны ў сістэме ідэнтыфікацыі беларускай ветслужбы, а пры счытванні існуючага ў ім QR-кода адкрываўся іншы сайт з падобным з афіцыйным парталам інтэрфейсам. На частцы прадукцыі меліся сляды зрэзаў ветэрынарных клеймаў.

На думку Рассельгаснагляду, усё гэта сведчыць аб спробе нядобрасумленных удзельнікаў знешнеэканамічнай дзейнасці схаваць сапраўднае паходжанне прадукцыі, якая ўвозіцца.

Аўтамабіль з грузам затрыманы, праводзіцца разбіральніцтва. Адабраныя ўзоры прадукцыі для лабараторных даследаванняў на наяўнасць небяспечных хвароб жывёл.

Паведамляецца, што пасля завяршэння праверачных мерапрыемстваў і атрымання вынікаў экспертыз у адпаведнасці з патрабаваннямі ветэрынарнага заканадаўства ў дачыненні да нелегальна ўвезенага грузу, як прадукцыі невядомага паходжання, якасці і бяспекі, будзе прынята рашэнне аб яго знішчэнні. Вінаватая асоба будзе прыцягнута да адказнасці.