Улады Пакістана пашырылі пералік спецыяльнасцей для працаўладкавання ў Беларусі, прапанаваны заробак — 600 долараў
30 кастрычніка, Позірк. Бюро эміграцыі і працаўладкавання за мяжой урада Пакістана 29 кастрычніка дадало прапановы па 11 спецыяльнасцях для працы грамадзян сваёй краіны ў Беларусі, сведчыць праведзены “Позіркам” аналіз даных гэтага рэсурсу.
У прыватнасці, кампанія Ajsa International Recruiter, якая знаходзіцца ў другім па велічыні пакістанскім горадзе Лахоры (сталіца правінцыі Пенджаб), з 29 кастрычніка прапануе працу плітачнікам, газавым зваршчыкам і дарожным рабочым (па пяць вакансій); дзесяці бетоншчыкам, электрыкам, электразваршчыкам, мантажнікам, цеслярам, тынкоўшчыкам і мулярам (па 10), а таксама малярам (15).
Усім абяцаецца заробак па 600 долараў.
Кампанія B.M.R. International, якая знаходзіцца ў Лахоры, па-ранейшаму (з 3 верасня) прапануе працу на будоўлі пяці зваршчыкам, дзесяці мулярам і бетоншчыкам, а таксама пятнаццаці арматуршчыкам і цеслярам. На ўсіх пазіцыях аднолькавы заробак — 1.800 беларускіх рублёў (каля 600 долараў). Колькасць вакансій за амаль два месяцы не памянялася.
Кампанія American International, якая знаходзіцца ў Пенджабе, з 1 верасня абяцае заробак у памеры 500 долараў 200 работнікам, якія будуць займацца перапрацоўкай рыбы і морапрадуктаў у Брэсце (верагодна, гаворка аб прадпрыемстве “Санта Брэмар”).
У той жа час з сайта знікла аб’ява кампаніі з Лахора Group Abu Abdullah, якая шукала шэсць вытворчых рабочых (у арыгінале blue collar — “сіні каўнерык”) на заробак 500–600 долараў. Магчыма, кампанія запоўніла гэтыя вакансіі.
27 жніўня федэральны міністр унутраных спраў і кантролю за абаротам наркотыкаў Пакістана Махсін Накві на сустрэчы ў Ісламабадзе з кіраўніком беларускага МУС Іванам Кубраковым заявіў пра намер “прыкласці ўсе намаганні для накіравання ў Беларусь найлепшай працоўнай сілы пасля дбайнай праверкі“.
11 красавіка Аляксандр Лукашэнка па выніках сустрэчы ў Мінску з кіраўніком урада Пакістана Шахбазам Шарыфам заявіў, што краіны дамовіліся выпрацаваць механізм прыезду ў Беларусь пакістанскіх працоўных мігрантаў. Паводле яго слоў, Беларусь гатова прыняць 100–150 тыс. спецыялістаў.
Гэтыя планы выклікалі неадназначную рэакцыю ў грамадстве, якая, у сваю чаргу, выклікала раздражненне ў беларускіх уладаў.
“Зацікаўленыя” хочуць “узбурыць беларускае грамадства” праблемай мігрантаў, у прыватнасці тэмай прыезду ў Беларусь работнікаў з Пакістана, заявіў Лукашэнка 25 красавіка на нарадзе аб развіцці раёнаў Гомельскай вобласці, пацярпелых у выніку выбуху на Чарнобыльскай АЭС.
Міністэрства ўнутраных спраў адрапартавала аб выяўленні “актыўных правакатараў, якія наўмысна спрабавалі нагнятаць абстаноўку ў краіне і маніпуляваць грамадскай думкай“, распаўсюджваючы інфармацыю аб уездзе ў Беларусь 150 тыс. грамадзян Пакістана.
Звязаны з сілавікамі тэлеграм-канал апублікаваў відэазапіс з затрыманымі за каментарыі і ролікі ў “ЦікТоку“ 18-гадовым хлопцам і 20-гадовай дзяўчынай. Маладыя людзі выбачаліся на камеру за “распаўсюд фэйкаў” і “гнеўныя каментарыі на адрас жыхароў цудоўнай краіны Пакістана”.
14 жніўня Лукашэнка ў віншаванні прэм’ер-міністру Пакістана Шахбазу Шарыфу з Днём незалежнасці нагадаў яму пра “накіраванне пакістанскіх кваліфікаваных спецыялістаў для працы ў Беларусь”.
Паводле звестак Міністэрства працы і сацыяльнай абароны Беларусі, за апошні год колькасць працоўных мігрантаў у краіне вырасла ў 1,5 раза, больш за палову з іх (54%) — грамадзяне Туркменістана і Узбекістана.
