Лукашэнка з 1 кастрычніка не паказваецца на публіцы па серадах, але прэс-служба паведамляе пра яго сустрэчы з чыноўнікамі
29 кастрычніка, Позірк. Прэс-служба Аляксандра Лукашэнкі паведаміла 29 кастрычніка, што ён заслухаў даклады старшыні праўлення Нацыянальнага банка Рамана Галоўчанкі і кіраўніка прэзідыума Нацыянальнай акадэміі навук Уладзіміра Караніка.
Паводле слоў Галоўчанкі, да 1 лістапада на разгляд Лукашэнкі неабходна прадставіць праект праграмы сацыяльна-эканамічнага развіцця Беларусі да 2030 года. У канчатковым выглядзе дакумент плануецца вынесці на зацвярджэнне Усебеларускага народнага сходу 18–19 снежня, адзначыў кіраўнік Нацбанка.
Адзначаецца, што адной з тэм дакладу Галоўчанкі стала “праца па практычнай рэалізацыі даручэнняў”, аддадзеных Лукашэнкам у верасні на нарадзе з апаратам Нацыянальнага банка і кіраўніцтвам банкаў. У прыватнасці, абмяркоўвалася “рэалізацыя задачы па большай ўцягнутасці банкаўскай сістэмы ў эканамічнае развіццё краіны”.
Каранік, як заяўляецца, далажыў аб ходзе падрыхтоўкі сустрэчы Лукашэнкі з “навуковай грамадскасцю”. Падкрэслена, што навуковая сфера “павінна ўнесці свой значны ўклад у рэалізацыю задач па развіцці краіны ў будучай пяцігодцы” з акцэнтам на “практыка-арыентаваныя распрацоўкі, узмацненне сувязі навукі і вытворчасці, імпартазамяшчэнне і нарошчванне экспартнага патэнцыялу, засваенне запатрабаваных у рэальным сектары інавацыйных напрамкаў”.
З Галоўчанкам Лукашэнка сустракаўся 16 кастрычніка на нарадзе па праектах прагнозных дакументаў на 2026 год і 9 верасня на згаданай нарадзе з апаратам Нацыянальнага банка і кіраўніцтвам банкаў.
З прызначаным 22 траўня Каранікам Лукашэнка сустракаўся на нарадзе з рабочай групай па аналізе дзейнасці НАН 5 жніўня.
На сайце Лукашэнкі не апублікаваныя фота і відэа гутарак з Галоўчанкам і Каранікам 29 кастрычніка. У неафіцыйным телеграм-канале прэс-службы апублікаваныя відэакаментарыі кіраўнікоў Нацбанка і НАН. Як мяркуецца, Галоўчанка даваў каментарый у адным з пакояў Нацбанка (фон на відэа размыты). Каранік зняты ў будынку Акадэміі навук.
Лукашэнка перастаў паказвацца на публіцы па серадах з 1 кастрычніка, калі яго прэс-служба размясціла толькі віншаванні розным палітычным дзеячам.
З 8 кастрычніка ў гэты дзень тыдня прэс-служба публікуе інфармацыю аб дакладах чыноўнікаў без фота і відэа з удзелам Лукашэнкі. Іншыя ўдзельнікі сустрэч, як правіла, даюць каментарыі ў будынках устаноў і ведамстваў, дзе працуюць.
8 кастрычніка, як паведамлялася, Лукашэнка прыняў у такім фармаце міністра сельскай гаспадаркі Юрыя Горлава, дзяржаўнага сакратара Савета бяспекі Аляксандра Вальфовіча і кіраўніка справамі прэзідэнта Юрыя Назарава.
15 кастрычніка “падрабязныя даклады” зрабілі прэм’ер-міністр Аляксандр Турчын і зноў Вальфовіч.
22 кастрычніка Лукашэнка “заслухаў даклады” кіраўніка сваёй адміністрацыі Дзмітрыя Крутога і старшыні Савета Рэспублікі Нацыянальнага сходу Наталлі Качанавай.
