Зяленскі: Украіна гатовая весці перамовы аб міры дзе заўгодна, толькі не ў Расіі і ўжо дакладна не ў Беларусі

28 кастрычніка, Позірк. Кіеў згодны на перамовы аб спыненні вайны ў любым месцы, заявіў журналістам 28 кастрычніка прэзідэнт Украіны Уладзімір Зяленскі.

Паводле яго слоў, якія прыводзіць Reuters, украінскія ўлады гатовыя весці перамовы, у прыватнасці, у Венгрыі, нягледзячы на сумневы ў “некаторых пазіцыях” прэм’ер-міністра гэтай краіны Віктара Орбана, які “ўсё блакуе для Украіны”.

“Калі будуць вынікі, то, хай Бог блаславіць, няхай перамовы пройдуць дзе заўгодна, — сказаў ён. — Гэта амаль не мае значэння, толькі не ў Расіі, вядома, і ўжо дакладна не ў Беларусі”.

Пры гэтым, падкрэсліў Зяленскі, да пачатку перамоў Украіна не будзе выводзіць войскі з “дадатковых тэрыторый”, як таго патрабуе Масква.

27 траўня Зяленскі назваў немагчымым правядзенне перамоў з Расіяй у Беларусі.

“Як вам сказаць, на што гэта падобна? Калі не хочуць, мне здаецца, людзі павінны сказаць: “Мы цяпер не гатовыя. Ці не хочам заканчваць вайну”. Бо гэта несур’ёзна. Беларусь для нас сёння з’яўляецца краінай, з якой паляцелі ракеты, і, адпаведна, яна з’яўляецца саюзнікам краіны, якая на нас напала. І войскі заходзілі з Беларусі. Гэта проста немагчыма ў дачыненні да Беларусі”, — канстатаваў кіраўнік украінскай дзяржавы.

Аляксандр Лукашэнка і прадстаўнікі яго рэжыму неаднаразова заяўлялі, што могуць прыняць у сябе перамоўныя дэлегацыі Украіны і РФ. Пры гэтым сваю ролю яны ацэньваюць супярэчліва: то выяўляючы гатоўнасць стаць пасрэднікам, то катэгарычна ад гэтага адмаўляючыся.

24 лютага 2022 года Расія развязала поўнамаштабную вайну супраць Украіны, у якой афіцыйны Мінск падтрымлівае Крэмль. Нягледзячы на тое, што беларуская тэрыторыя і інфраструктура выкарыстоўваліся для нападу, некалькі раўндаў перамоў паміж Масквой і Кіевам напачатку вайны прайшлі менавіта ў Беларусі.

Пазней прадстаўнікі рэжыму ў Мінску неаднаразова заяўлялі, што Беларусь павінна быць прадстаўлена на мірных перамовах паміж РФ і Украінай.