Мінпрацы абнавіла пералік прафесій для спрошчанага працаўладкавання замежнікаў

28 кастрычніка, Позірк. Міністэрства працы абнавіла пералік прафесій, даступных у 2026 годзе для спрошчанага працаўладкавання замежных грамадзян, вынікае з паведамлення ведамства.

У пералік уключана 29 рабочых спецыяльнасцяў: кіроўца, бетоншчык, жывёлавод, муляр, маляр, машыніст аджымнога абсталявання (гарбарная і скурсыравінная вытворчасць), мяздрыльшчык, манцёр шляху, агароднік, абрэзчык матэрыялаў, аператар машыннага даення, кухар, цясляр, прасаўшчык скур, прадавец, рабочы па комплексным абслугоўванні і рамонце будынкаў і збудаванняў, расцяжчык скур і аўчын на рамы, санітар, слесар механазборачных работ, слесар па рамонце аўтамабіляў, слесар-рамонтнік, слесар-сантэхнік, токар, трактарыст-машыніст сельскагаспадарчай вытворчасці, фрэзероўшчык, швачка (усіх найменняў), тынкоўшчык, электрагазазваршчык, электраманцёр па рамонце і абслугоўванню электраабсталявання.

У спісе таксама 17 прафесій служачых: аграном, акушэр, ветэрынарны ўрач, ветэрынарны фельчар, урач-спецыяліст (усіх найменняў і профіляў медыцынскіх спецыяльнасцяў), заатэхнік, інжынер, інжынер-канструктар, інжынер-механік, інжынер-праграміст, інжынер-тэхнолаг, інжынер-электронік, інжынер-энергетык, медыцынская сястра і медыцынскі брат (усіх найменняў і медыцынскіх спецыяльнасцяў), памочнік урача па амбулаторна-паліклінічнай дапамозе, тэхнік, фельчар (усіх найменняў і медыцынскіх спецыяльнасцяў).

Як адзначаецца, пры прыёме на працу замежнікаў па прафесіях і на пасады, уключаныя ў пералік, “наймальніку дастаткова паведаміць орган унутраных спраў”.

У іншых выпадках працадаўцу трэба “атрымаць спецыяльны дазвол і даказаць, што заняцце свабодных працоўных месцаў (вакансій) не можа быць забяспечана грамадзянамі Беларусі і замежнікамі, якія маюць ВНЖ”.

Раней паведамлялася, што станоўчы вынік на экзамене сярод імігрантаў на веданне адной з дзяржаўных моў 30 верасня атрымала 90% удзельнікаў. У тэставанні ўзялі ўдзел 90 чалавек, якія прэтэндуюць на працаўладкаванне ў Беларусі.

Першы экзамен для замежнікаў на веданне рускай або беларускай мовы 30 верасня планавала здаваць каля 200 працоўных мігрантаў, тэст праходзіў у аўдыторыях шасці ВНУ.

Выпрабаванні праходзяць па стандартах, якія выкарыстоўваюцца пры цэнтралізаваным экзамене або цэнтралізаваным тэставанні: у аўдыторыях устаноўленыя відэакамеры, туды нельга прыносіць мабільныя тэлефоны і іншыя сродкі сувязі і пісьмовыя матэрыялы, забаронена мяняцца месцамі і бланкамі тэстаў, размаўляць з іншымі экзаменуемымі, выносіць заданні, фатаграфаваць, выходзіць з памяшкання без дазволу.

Экзамен праходзіць у форме пісьмовага тэставання. На яго выкананне адводзіцца паўгадзіны. За гэты час неабходна адказаць на 20 пытанняў, 17 з іх з прапанаванымі варыянтамі адказу.

Для паспяховай здачы неабходна даць правільныя адказы як мінімум на палову пытанняў. У выпадку няздачы працоўны дагавор з мігрантам не заключаецца.

Пры гэтым на пераздачу можна зарэгістравацца неабмежаваную колькасць разоў.

Пастановай урада ад 3 верасня № 477 вызначаны пералік прафесій рабочых і пасад служачых, для занятку якімі замежным мігрантам спатрэбіцца прайсці ацэнку ведання валодання адной з дзяржаўных моў — беларускай альбо рускай.

Паводле даных Парламенцкай асамблеі Савета Еўропы, ад 200 да 500 тыс. чалавек пакінула Беларусь пасля падзей жніўня 2020 года. Упраўленне вярхоўнага камісара ААН па правах чалавека называе меншую лічбу — 100 тыс.

Дэфіцыт працоўных рук у Беларусі з’яўляецца “доўгачасовым і стратэгічным выклікам як у колькасным, так і ў якасным аспектах”, заявіла ў траўні намесніца міністра эканомікі Таццяна Бранцэвіч. Яна перакананая, што на першым месцы па актуальнасці для Беларусі павінна стаяць “задача не прыцягнення новых працоўных рэсурсаў здалёку”, а ўтрыманне сваіх кадраў, а яшчэ лепш — “вяртанне суграмадзян, якія мігравалі”.

У верасні 2025 года ў беларускай эканоміцы было занята 4 млн 151 тыс. чалавек — на 5,2 тыс. менш, чым у жніўні (4 млн 156,2 тыс.; -0,13%), сведчыць праведзены “Позіркам” аналіз даных Нацыянальнага статыстычнага камітэта.

У студзені 2025 года ў эканоміцы было занята 4 млн 131,6 тыс. чалавек, у лютым — 4 млн 141 тыс., сакавіку — 4 млн 146,2 тыс., красавіку — 4 млн 135,8 тыс., траўні — 4 млн 122,1 тыс., чэрвені — 4 млн 149,7 тыс., ліпені — 4 млн 148 тыс.

Паводле даных Дзяржаўнай службы занятасці, на 28 кастрычніка на рынку працы Беларусі прапануецца 178.464 вакансіі.