27 кастрычніка, Позірк. Пункт пропуску Шальчынінкай на мяжы з Беларуссю цалкам зачынены на нявызначаны тэрмін, праз Мядзінінкай могуць перасоўвацца “толькі некаторыя катэгорыі асоб”, паведамляе Служба аховы дзяржаўнай мяжы Літвы (САДМ).
Удакладняецца, што праз Мядзінінкай могуць праязджаць асобы, якія маюць дыпламатычныя пашпарты або перавозяць дыпламатычную пошту Літвы; якія вандруюць са спрошчаным транзітным дакументам; асобы, якія едуць транзітам у Калінінградскую вобласць (РФ) з Беларусі і назад; людзі, якія накіроўваюцца ў Літву, — грамадзяне Літвы, краін ЕС і члены іх сем’яў, уладальнікі віду на жыхарства ў Літве.
Як паведамлялася, прэм’ер-міністр Літвы Інга Ругінене пасля праведзенага 27 кастрычніка пасяджэння Камісіі па нацыянальнай бяспецы заявіла, што ў сувязі з масавымі залётамі метэазондаў з тэрыторыі Беларусі ўрад балтыйскай дзяржавы падрыхтаваў праект пастановы аб закрыцці мяжы “на нявызначаны тэрмін”.
Паводле яе слоў, у рашэнні прадугледжаныя выключэнні: “Гэта азначае, што дыпламаты і дыпламатычная пошта змогуць перасоўвацца, а нашы грамадзяне і грамадзяне краін ЕС таксама змогуць уязджаць да нас з Беларусі, але ўсё астатняе перамяшчэнне будзе закрытае. Такім чынам, мы пасылаем сігнал Беларусі і кажам, што не пацерпім тут ніякіх гібрыдных нападаў, мы прымем усе самыя строгія меры для спынення падобных нападаў”.
Агенцтва BNS пазней удакладніла, што, паводле слоў Ругінене, Служба аховы дзяржаўнай мяжы Літвы (САДС) падоўжыць да 29 кастрычніка рашэнне аб закрыцці мяжы з Беларуссю. Першапачатковае рашэнне ведамства прыняло ўвечары 26 кастрычніка на 24 гадзіны.
“Мяжа будзе закрытая, а калі казаць пра транзіт, які ажыццяўляецца праз беларускую мяжу (у Калінінградскую вобласць РФ. — “Позірк”.), я кажу пра грузавікі, то мяжа будзе закрытая цяпер ужо на нявызначаны тэрмін”, — сказала прэм’ер.
Мінулай ноччу з-за залёту аэрастатаў у чацвёрты раз прыпыняў працу аэрапорт у Вільнюсе. Таксама Літва прыкладна з 22:10 закрыла абодва наземныя пункты пропуску на мяжы з Беларуссю — Мядзінінкай (з беларускага боку Каменны Лог) і Шальчынінкай (Беняконі). Апошні раз да гэтага яны зачыняліся з 22:45 25 кастрычніка да 2:00 26 кастрычніка.
Раней прэзідэнт Літвы Гітанас Наўседа прапанаваў абмежаваць транзіт з Беларусі ў Калінінградскую вобласць (РФ) праз залёт у краіну аэрастатаў.
