У Магілёўскай вобласці за хабар затрыманы кіраўнік дзяржпрадпрыемства

27 кастрычніка, Позірк. Аб выяўленні “фактаў сістэмнай дзелавой карупцыі” ў Магілёўскай вобласці паведамляе Міністэрства ўнутраных спраў.

“Устаноўлена: кіраўнік аднаго з дзяржпрадпрыемстваў па арганізацыі харчавання ва ўстановах адукацыі лабіраваў інтарэсы камерцыйных структур і індывідуальных прадпрымальнікаў. Грашовыя ўзнагароды яму перадавалі за садзейнічанне ў заключэнні дагавораў на аказанне паслуг”, — адзначае ведамства.

33-гадовы мужчына затрыманы з доказамі злачынства пры атрыманні чарговай “падзякі”, заяўляе ведамства. Агульная сума хабараў перавысіла 25 тыс. рублёў.

“Следчымі распачатыя крымінальныя справы за атрыманне хабару ў буйным памеры. Фігуранту пагражае да 10 гадоў пазбаўлення волі. Устанаўліваюцца іншыя эпізоды яго злачыннай дзейнасці”, — адзначае МУС.

Аб затрыманнях за хабар менеджараў дзяржпрадпрыемстваў МУС справаздачыцца рэгулярна.

“Асобныя станоўчыя тэндэнцыі” ў дынаміцы выяўлення карупцыйных злачынстваў у гэтым годзе “аб’ектыўна страчаны”, заявіў 26 верасня кіраўнік Міністэрства ўнутраных спраў Іван Кубракоў на пасяджэнні калегіі МУС.

Паводле паведамлення прэс-службы ведамства, ён раскрытыкаваў шэраг тэрытарыяльных падраздзяленняў па барацьбе з эканамічнай злачыннасцю (БЭЗ).

Кубракоў таксама адзначыў, што МУС перайшло ад “бытавых” хабараў да выяўлення і спынення схем сістэмнай “дзелавой” карупцыі. Актыўней выкарыстоўваецца інструментарый аператыўна-вышуковай прафілактыкі, сказаў ён.

Намеснік міністра ўнутраных спраў — начальнік крымінальнай міліцыі Генадзь Казакевіч паведаміў, што з пачатку 2025 года спынена 22 схемы, звязаныя з сістэмнай “дзелавой” карупцыяй, у якіх удзельнічалі 114 фігурантаў, з іх 92 — хабарнікі. У сем такіх схем былі ўцягнутыя службовыя асобы сельгаспрадпрыемстваў.

“Акцэнт у працы ОУС ссунуты на выяўленне буйных хабараў. Калі ў 2022 годзе іх агульная сума складала крыху больш за два мільёны рублёў, то ў мінулым — каля шасці. За восем месяцаў бягучага года ўжо каля пяці мільёнаў рублёў”, — сказаў Казакевіч.

Згодна з данымі Вярхоўнага суда, якія раней прыводзіў “Позірк”, у студзені — чэрвені 2025 года за здзяйсненне карупцыйных злачынстваў асуджана 304 чалавекі — на 7,3% менш, чым за той жа перыяд 2024-га (328). З іх 84 прыгавораныя да пазбаўлення волі.