Кіраўнік МУС Літвы: Калі ўявіць, што мы выцягнем гармату на мяжу і пачнем страляць па аэрастатах, то гэтага не будзе

26 кастрычніка, Позірк. Аб выніках нарады кіраўнікоў сілавых ведамстваў Літвы, прысвечанай інцыдэнтам з аэрастатамі з Беларусі, паведаміў журналістам 26 кастрычніка міністр унутраных спраў балтыйскай дзяржавы Уладзіслаў Кандратовіч.

Паводле яго слоў, якія прыводзіць Delfi, МУС Літвы “ўзмоцніць узаемадзеянне з літоўскімі вайскоўцамі” для процідзеяння кантрабандзе.

“Сумесныя праваахоўныя групы”, у склад якіх увойдуць супрацоўнікі крымінальнай выведкі і мытнай службы, “дапамогуць прадухіліць супрацьпраўныя дзеянні”, адзначыў кіраўнік ведамства.

Кандратовіч паведаміў, што ўхваленая пастанова, якая дазволіць “неадкладна закрываць пэўныя зоны паветранай прасторы ў выпадку пранікнення ў іх кантрабандных паветраных шароў”. “Калі ў паветранай прасторы будзе заўважаны неапазнаны аб’ект, можна будзе неадкладна закрыць пэўную зону. Уся Літва падзелена на 24 зоны, таму на працягу 10 хвілін можна закрыць любую зону і прыняць неабходныя меры”, — удакладніў міністр.

“Я б не хацеў пералічваць канкрэтныя дзеянні, [якія плануюцца], іх ведае вайсковае камандаванне. Я сказаў, што мы будзем планаваць. Вам гэтага здаецца мала, але мы ўжо сёння дзейнічаем. Мы зможам задзейнічаць асобныя элементы СПА, выведкі, гэта вельмі хутка дасць вынікі. Калі ўявіць, што сёння мы выцягнем гармату на мяжу і пачнем страляць [па аэрастатах] направа і налева, гэтага не адбудзецца. Але будуць іншыя меры, не менш эфектыўныя”, — падкрэсліў Кандратовіч.

“Мы часта расказваем, што мы робім і якія дзеянні робім. На жаль, кантрабандысты таксама слухаюць вашы перадачы, а на наступны вечар мы бачым, што яны мяняюць тактыку”, — дадаў ён.

Паводле слоў кіраўніка МУС, для процідзеяння метэазондам плануецца выкарыстоўваць БПЛА. Таксама ён анансаваў актывізацыю працы з мэтай выяўлення схем кантрабанды.

“Мы не спыняемся на дасягнутым і рашуча спыняем злачынную дзейнасць. Дзейнасць кантрабандных сіндыкатаў не мае межаў. Мы назіраем падобныя з’явы ў Літве. У нашу следчую групу ўвойдуць эксперты-крыміналісты па крымінальнай выведцы”, — удакладніў Кандратовіч.

Раней паведамлялася, што прэзідэнт Літвы Гітанас Наўседа прапанаваў абмежаваць транзіт з Беларусі ў Калінінградскую вобласць (РФ) праз залёты ў краіну аэрастатаў.

прэм’ер-міністр Літвы Інга Ругінене анансавала пасяджэнне Камісіі па нацыянальнай бяспецы, па выніках якога ў панядзелак будуць прапанаваныя “канкрэтныя рашэнні” па сітуацыі з аэрастатамі.

Увечары 25 кастрычніка праз залёт аэрастатаў з Беларусі Літва закрыла мяжу з Беларуссю і прыпыніла працу аэрапорта ў Вільнюсе. Уначы абмежаванні былі знятыя.

Паведамлялася, што праз прыпыненне працы аэрапорта “пацярпела каля 3.500 пасажыраў, 25 рэйсаў былі скасаваныя, 4 перанакіраваныя, а 14 пацярпелі”.

Раней на гэтым тыдні праца літоўскіх аэрапортаў двойчы прыпынялася праз аэрастаты, што ляцелі з тэрыторыі Беларусі — такія, якія апошнім часам выкарыстоўваюць кантрабандысты для незаконнага транспартавання цыгарэт.

Першы выпадак здарыўся ў ноч на 22 кастрычніка. Праз аэрастаты ў аэрапорце Вільнюса затрымалі або скасавалі восем рэйсаў. У мэтах бяспекі Літва да 9 гадзін раніцы прыпыніла працу пунктаў пропуску Мядзінінкай (з беларускага боку Каменны Лог) і Шальчынінкай (Беняконі). У той жа дзень паверанаму ў справах Беларусі была ўручана нота пратэсту ў сувязі з парушэннем паветранай прасторы.

Прэм’ер-міністр Літвы Інга Ругінене папярэдзіла, што ў выпадку яшчэ аднаго масавага прылёту аэрастатаў з кантрабандай мяжа з Беларуссю будзе закрытая. Пра перспектывы закрыцця мяжы “на больш працяглы тэрмін” заявіў галоўны дарадца літоўскага прэзідэнта Дэйвідас Матулёніс.

Праз чарговы прылёт шароў з Беларусі ўвечары 24 кастрычніка Літва трымала мяжу закрытай да поўдня 25 кастрычніка. З’яўленне аэрастатаў парушыла працу аэрапортаў Вільнюса і Каўнаса, самалёты перанакіроўвалі ў Палангу (Літва), Рыгу (Латвія), Катовіцэ, Гданьск (Польшча).

На гэтым фоне Ругінене анансавала новае пасяджэнне Камісіі па нацыянальнай бяспецы на наступным тыдні, падчас якога плануецца “ацаніць наступствы ўжо прынятых рашэнняў і абмеркаваць, якія яшчэ захады можна зрабіць у кароткатэрміновай перспектыве, каб нанесці шкоду як кантрабандыстам, так і рэжыму Лукашэнкі, які дазваляе ім бясчынстваваць”.

25 кастрычніка МЗС Літвы ўручыла паверанаму ў справах Беларусі “строгую ноту пратэсту”, папярэдзіўшы, што Вільнюс “расцэньвае гэтыя інцыдэнты як свядомую правакацыю і эскалацыю напружанасці”.

Беларускі дэмакратычны лідар Святлана Ціханоўская назвала інцыдэнты з аэрастатамі сведчаннем таго, што рэжым Аляксандра Лукашэнкі “выкарыстоўвае кантрабанду як інструмент гібрыднай атакі супраць Еўропы”. Паводле яе слоў, рэжым “ператварыў вытворчасць і нелегальны вываз цыгарэт у частку сваёй палітычнай і эканамічнай стратэгіі”; грошы ад кантрабанды “ідуць не крымінальным групоўкам, а непасрэдна ў рэжымныя “гаманцы”.

Палітык падтрымала “крокі Літвы і яе партнёраў, скіраваныя на ўзмацненне санкцый супраць вытворцаў, перавозчыкаў і арганізатараў кантрабанды”, але заклікала “пакінуць адкрытымі гуманітарныя і пасажырскія пераходы для сумленных беларусаў і тых, хто ўцякае ад рэпрэсій”.