Лукашэнка заявіў пра гатоўнасць да “вялікай здзелкі” з ЗША (дапоўнена)
14 кастрычніка, Позірк. Нараду па пытаннях “глабальнай міжнароднай абстаноўкі і развіцці беларуска-амерыканскіх адносін” праводзіць 14 кастрычніка Аляксандр Лукашэнка, паведамляе яго прэс-служба.
У нарадзе бяруць удзел старшыня КДБ Іван Церцель, прэм’ер-міністр Аляксандр Турчын, кіраўнік адміністрацыі Лукашэнкі Дзмітрый Круты, дзяржсакратар Савета бяспекі Аляксандр Вальфовіч, генеральны пракурор Андрэй Швед.
Лукашэнка заявіў на нарадзе аб гатоўнасці да “вялікай здзелкі” з ЗША.
“Будзем чакаць іх прапановы глабальныя, вялікой здзелкі, як яны ўмеюць казаць (любяць яны гэтыя вялікія здзелкі). Мы да гэтага гатовыя. Мы гатовыя з імі заключыць вялікую здзелку. На адной шалі вагаў іх пытанні, просьбы і патрабаванні, на другой шалі вагаў — нашы пытанні і патрабаванні. Вырашаем? Давайце будзем вырашаць. Мы да гэтага гатовыя. Прапановы [прэзідэнта ЗША] Дональда Трампа ў гэтым плане я абсалютна ацэньваю нармальна. Але павінны быць улічаныя і нашы інтарэсы. І ўсё павінна быць сумленна, як калісьці мы з амерыканцамі дамаўляліся”, — сказаў Лукашэнка.
Ён даручыў выпрацаваць алгарытм беларуска-амерыканскіх адносін “на перспектыву” з улікам “прагрэсу, які ўзнік у кантактах з Вашынгтонам”.
“Пры гэтым мы павінны больш дакладна вызначыць свае прыярытэты. Таксама важна ўстанавіць, як у нас модна цяпер казаць, чырвоныя лініі, пераход якіх для нас непрымальны. Важна ўлічваць, каб нашы дзеянні ні ў якім разе не нанеслі шкоду не толькі беларуска-расійскім, але і беларуска-кітайскім адносінам, а таксама нашым абавязацельствам перад іншымі дружалюбнымі краінамі ў рамках удзелу Беларусі ў еўразійскіх інтэграцыйных аб’яднаннях. Гэта святое. Мы дамовіліся, падпісалі адпаведныя пагадненні. Таму павінны дзейнічаць у гэтых рамках”, — падкрэсліў палітык.
Паводле яго слоў, Беларусь з’яўляецца “найбліжэйшым саюзнікам Расіі ў пытанні вырашэння ўкраінскага крызісу”. “Калі амерыканцы хочуць урэгуляваць канфлікт ва Украіне і бачаць там нейкую невялікую нашу ролю, мы гатовыя ў гэтым удзельнічаць”, — адзначыў прамоўца.
Лукашэнка заявіў, што Украіна “павінна існаваць як суверэнная незалежная дзяржава”.
“Мы за тое, каб вайна была спыненая цяпер, у адваротным выпадку знікне гэта незалежная суверэнная дзяржава. Тым больш што некаторыя (ведаеце, хто) ужо пазіраюць на заходнія вобласці Украіны”, — сказаў Лукашэнка, не канкрэтызаваўшы свой намёк.
2 лютага 2025 года ў выніку непублічных перамоваў у Мінску намесніка памочніка дзяржсакратара ЗША Крыстафера Сміта і прадстаўнікоў беларускіх уладаў былі вызваленыя і адпраўленыя ў Літву палітвязні Андрэй Кузнечык (супрацоўнік “Радыё Свабода”), Алена Маўшук, а таксама асуджаны ў рамках палітычна матываванай справы амерыканскі і ўкраінскі грамадзянін Мікалай Шугаеў.
21 чэрвеня ў беларускай сталіцы адбыліся перамовы Лукашэнкі і спецпрадстаўніка Трампа па украіне Кіта Келага. Неўзабаве пасля гэтага на волю адпусцілі і дэ-факта выслалі з краіны 14 чалавек, пераважна палітвязняў, у тым ліку відэаблогера Сяргея Ціханоўскага — мужа Святланы Ціханоўскай.
52 зняволеных, у тым ліку 40 палітычных, было вызвалена 11 верасня ў рамках здзелкі паміж адміністрацыяй Трампа і Лукашэнкі. Умовай вызвалення быў выезд вязняў з краіны.
Адзін з вызваленых — апазіцыйны палітык Мікалай Статкевіч — адмовіўся эміграваць у Літву, куды павезлі групу, і вярнуўся на беларускую тэрыторыю.
Лукашэнка зноў абвінаваціў Зяленскага ў нежаданні дамаўляцца пра мір, паўтарыўшы пры гэтым шэраг ілжывых тэзісаў
12 кастрычніка, Позірк. У нежаданні дамаўляцца аб спыненні вайны з РФ Аляксандр Лукашэнка дэ-факта абвінаваціў прэзідэнта Украіны Уладзіміра Зяленскага, адказваючы на пытанні журналістаў на палях саміту СНД (праходзіў у Душанбэ 9–10 кастрычніка). Адпаведныя цытаты прэс-служба палітыка апублікавала 12 кастрычніка. Лукашэнка …
