БЧ прыцягнула дзяцей для ўдзелу ў “конкурсе антыкарупцыйнай рэкламы”

14 кастрычніка, Позірк. Аб праведзеным “конкурсе сацыяльнай антыкарупцыйнай рэкламы” паведаміла Беларуская чыгунка (БЧ).

Падкрэсліваецца, што конкурс быў арганізаваны “з мэтай прыцягнення моладзі, якая навучаецца і працуе, да ўдзелу ў прафілактыцы карупцыі, антыкарупцыйнай асветы насельніцтва і фарміравання ў грамадстве нецярпімага стаўлення да карупцыйных праяў”.

Удзельнікамі мерапрыемства сталі супрацоўнікі БЧ ўзросце да 25 гадоў, дзеці работнікаў арганізацыі, а таксама, як заяўляецца, “юныя чыгуначнікі — выхаванцы Дзіцячай чыгункі імя К.С.Заслонава”.

“Конкурс праводзіўся ў трох узроставых групах: ад 10 да 15 гадоў, ад 16 да 20 гадоў і ад 21 года да 25 гадоў. Свае работы ўдзельнікі прадставілі ў наступных намінацыях: “Лепшы малюнак”, “Лепшы плакат”, “Лепшы відэаролік”. Усяго на конкурс паступіла 62 работы”, — гаворыцца ў паведамленні.

Адзначаецца, што пры ацэнцы работ журы ўлічвала “іх адпаведнасць заяўленай тэматыцы, інфарматыўнасць, адсутнасць плагіяту, глыбіню раскрыцця тэмы, якасць выканання, магчымасць далейшага выкарыстання іх як сацыяльнай антыкарупцыйнай рэкламы”.

Як паведамляў “Позірк”, у красавіку гэтага года менеджары БЧ прынеслі клятву аб “недапушчальнасці карупцыйных праяў”.

Адзначалася, што гэта адбылося “ў фармаце відэаканферэнцыі”. У мерапрыемстве прынялі ўдзел начальнік БЧ Валерый Вярэніч, яго намеснікі, кіраўнікі структурных падраздзяленняў аб’яднання і іншых яго аддзяленняў.

Падчас цырымоніі, “звяртаючыся да прысутных”, Вярэніч назваў карупцыю “сур’ёзнай і надзённай праблемай” не толькі для БЧ, але і “ў цэлым для краіны”. “Яна падрывае асновы дзяржавы і наносіць сур’ёзны рэпутацыйны ўрон Беларускай чыгунцы, стварае негатыўнае меркаванне ў грамадстве і кідае цень на шматтысячны калектыў добрасумленных і адказных работнікаў”, — сказаў ён.

Паводле сцвярджэння кіраўніка БЧ, прынесеная клятва “стане яшчэ адной дадатковай мерай стымулявання работнікаў да законапаслухмяных паводзін, накіраваных на папярэджанне, выяўленне, спыненне правапарушэнняў, якія могуць ствараць умовы для карупцыйных праяў”.

Антыкарупцыйныя мерапрыемствы на БЧ праходзяць на фоне гучных крымінальных спраў.

14 жніўня стала вядома, што суд Заводскага раёна Мінска прыгаварыў былога першага намесніка начальніка БЧ Пятра Дулуба “па сукупнасці злачынстваў, прадугледжаных ч. 2 і ч. 3 арт. 430 Крымінальнага кодэкса (атрыманне хабару)”, да 11 гадоў пазбаўлення волі “з максімальна магчымым штрафам у суме 5 тыс. базавых велічынь (210 тыс. рублёў)”. Паведамлялася, што ў яго было канфіскавана больш за 2,8 млн долараў і каля 300 тыс. еўра.

3 чэрвеня 2024 ініцыятыва “Супольнасць чыгуначнікаў Беларусі” са спасылкай на свае крыніцы паведаміла аб затрыманні Дулуба — “за карупцыю”, а ў канцы ліпеня — намеснік начальніка БЧ Сяргея Сізіна і галоўнага інжынера Сяргея Навадворскага.

14 кастрычніка мінулага года ініцыятыва паведаміла аб затрыманні ў рамках арт. 430 КК начальніка службы перавозак БЧ Віталя Панюшэнкі, яго намесніка — начальніка Цэнтра кіравання перавозкамі (ЦКП) Фёдара Шулянкова, а таксама першага намесніка начальніка ЦКП — кіраўніка аператыўна-распарадчага аддзела Аляксандра Іванова.

1 красавіка прэс-служба Міністэрства ўнутраных спраў пацвердзіла затрыманне ў канцы 2024 года начальніка службы перавозак БЧ, яго намесніка, а таксама першага намесніка начальніка Цэнтра кіравання перавозкамі БЧ.

Адзначалася, што ўсе трое — падначаленыя аднаго з кіраўнікоў БЧ, якога затрымалі летам мінулага года за “сістэматычнае атрыманне хабараў” на агульную суму каля 3 млн долараў.