З 2023 года праз “камісію Шведа” ў Беларусь вярнулася 30 чалавек — Генпракуратура

8 кастрычніка, Позірк. 30 чалавек вярнулася ў Беларусь праз “камісію па вяртанні” з моманту яе заснавання ў пачатку 2023 года, паведаміў 8 кастрычніка ў інтэрв’ю дзяржтэлеканалу “Першы інфармацыйны” намеснік генеральнага пракурора Аляксей Стук.

Паводле яго слоў, у камісію паступіла 323 звароты, 70 з іх былі “разгледжаныя па сутнасці”. Астатнія патрабавалі ўдакладненняў, бо ў некаторых заявах не хапала неабходных звестак і камісія прапаноўвала дапоўніць інфармацыю, адзначыў намеснік кіраўніка ведамства.

Таксама камісія разглядала справы 16 футбалістаў і хакеістаў, якім, як раней паведамлялася, паводле палітычных матываў не дазвалялася гуляць у Беларусі. У дачыненні да 11 з іх камісія прыняла станоўчае рашэнне.

Праваабаронцам вядома як мінімум пра тры выпадкі, калі, нягледзячы на “дамоўленасці” з камісіяй, супраць людзей распачыналі крымінальныя справы пасля іх вяртання ў Беларусь. Пра гэта паведамляе праваабарончы цэнтр “Вясна”.

Генеральны пракурор Андрэй Швед паведамляў у чэрвені, што ў бягучым годзе колькасць зваротаў павялічылася ў два разы, усяго з лютага 2023 года было атрымана каля 300 зваротаў.

26 лютага Швед заявіў, што камісія разгледзела 241 адпаведны зварот. Тады ён паведаміў, што больш за 30 грамадзян атрымалі станоўчы адказ, 20 чалавек вярнуліся ў Беларусь.

4 лютага генпракурор паведаміў, што “прыкладна 40 асобам” патлумачылі, што яны “могуць спакойна вяртацца”, да іх у сілавікоў няма ніякіх прэтэнзій.

Камісія пад кіраўніцтвам Шведа была створаная пасля нарады ў Аляксандра Лукашэнкі 24 студзеня 2023 года. Адпаведны ўказ ён падпісаў 6 лютага таго ж года. 17 кастрычніка 2024-га стала вядома, што паўнамоцтвы камісіі пашыраныя — цяпер яна можа разглядаць заявы асоб, якія пражываюць у Беларусі.