Ціханоўская выступіць на кангрэсе Партыі еўрапейскіх сацыялістаў у Амстэрдаме

Апублікавана на адкрытай версіі “Позірку” 6 кастрычніка 2025 года ў 09:26

5 кастрычніка, Позірк. Святлана Ціханоўская ўключана ў спіс спікераў на штогадовым кангрэсе Партыі еўрапейскіх сацыялістаў (PES), які пройдзе з 16 па 18 кастрычніка ў Амстэрдаме.

У суправаджальнай інфармацыі палітык названая апазіцыйным лідарам, кіраўніком Аб’яднанага пераходнага кабінета, абраным прэзідэнтам Беларусі, “агульнапрызнаным пераможцам“ прэзідэнцкіх выбараў 9 жніўня 2020 года ў суперніцтве з “аўтакратам Аляксандрам Лукашэнкам”.

“Незалежныя назіральнікі сыходзяцца ў меркаванні, што яна атрымала перамогу на выбарах, азмрочаных фальсіфікацыямі і жорсткімі рэпрэсіямі, якія пачаліся за імі. Калі 24 лютага 2022 года Расія пачала поўнамаштабнае ўварванне ва Украіну, Ціханоўская была адным з першых лідараў, якія асудзілі агрэсію, адкрыта падтрымалі Украіну і ініцыявалі антываенную кампанію. Яна паслядоўна заклікала да ўзмацнення жорсткасці санкцый супраць рэжымаў як Пуціна, так і Лукашэнкі“, — гаворыцца ў даведцы.

Адзначаецца, што Ціханоўская, “будучы лідарам дэмакратычных сіл Беларусі“, “заснавала ў выгнанні найважнейшыя дэмакратычныя інстытуты”. Яна стварыла “Аб’яднаны пераходны кабінет, які каардынуе стратэгічныя рашэнні“, і ініцыявала стварэнне “Каардынацыйнай рады — выбарнага протапарламента ў выгнанні, які прадстаўляе голас беларусаў усяго свету“.

“Ціханоўская наведала больш за 35 краін, выступаючы за вызваленне больш за 1.300 палітычных зняволеных, забяспечваючы гуманітарную дапамогу беларусам і прасоўваючы мірную, дэмакратычную будучыню з дапамогай свабодных і справядлівых выбараў. Многія краіны дэ-факта прызналі яе законным лідарам Беларусі”, — падкрэсліваецца ў дасье.

Пасля 2020 года Ціханоўская, на думку PES, стала“глабальным сімвалам мірнага супраціву, дэмакратычнай стойкасці і моцнага жаночага лідарства”.

На з’езд чакаецца прыбыццё прэзідэнта Еўрапейскага савета Антоніу Кошты, прэм’ер-міністра Іспаніі Педра Санчаса, віцэ-канцлера Германіі Ларса Клінгбайля і інш.

Ціханоўская выступала на кангрэсе PES у лістападзе 2023 года ў Малазе (Іспанія). Там жа статус назіральніка ў PES атрымалі дэ-юрэ ліквідаваныя на радзіме Беларуская сацыял-дэмакратычная партыя (Грамада) і партыя “Народная Грамада“.

Партыя еўрапейскіх сацыялістаў аб’ядноўвае сацыялістычныя і сацыял-дэмакратычныя партыі кантынента. Заснавана ў 1992 годзе. У Еўрапейскім парламенце ўтварае другую па велічыні фракцыю Прагрэсіўны альянс сацыялістаў і дэмакратаў (18,9% месцаў па выніках выбараў 2024 года) пасля правацэнтрысцкай Еўрапейскай народнай партыі (26,1%).

6 і 7 кастрычніка Ціханоўская наведае Парыж на запрашэнне старшыні Нацыянальнага сходу Францыі.