15 верасня, Позірк. За эпізодам вучэнняў “Захад-2025” на 227-м агульнавайсковым палігоне (Барысаў, Мінская вобласць) 15 верасня назіраюць прадстаўнікі трох краін НАТО — ЗША, Турцыі і Венгрыі, вынікае з паведамлення прэс-службы Міністэрства абароны.
Ведамства сцвярджае, што “амерыканскі вайсковы аташэ падзякаваў міністру абароны” Віктару Хрэнін “за запрашэнне назіраць” за манеўрамі. У сваю чаргу беларускі міністр даручыў даць “амерыканскім гасцям лепшыя месцы, паказаць абсалютна ўсё, што іх цікавіць”.
Агулам на вучэннях прысутнічаюць назіральнікі з 23 дзяржаў, адзначае Мінабароны.
Беларуска-расійскія стратэгічныя вучэнні “Захад-2025” праходзяць 12–16 верасня на палігонах абедзвюх краін, а таксама ў акваторыях Балтыйскага і Баранцава мораў.
У першы дзень вучэнняў Хрэнін заявіў, што манеўры праводзяцца “на значным аддаленні ад паўднёвых і заходніх межаў” і не скіраваныя “супраць нейкай канкрэтнай краіны або краін”.
Напярэдадні згаданых вучэнняў Літва падвысіла пільнасць, Латвія — закрыла неба ля межаў з Беларуссю і РФ, Польшча — закрыла саму мяжу з Беларуссю.
