Лукашэнка назваў Беларусь “правераным партнёрам” Зімбабвэ

15 верасня, Позірк. Гатоўнасць паглыбляць “дружалюбныя стасункі” з Зімбабвэ выказаў Аляксандр Лукашэнка, віншуючы 15 верасня прэзідэнта гэтай афрыканскай дзяржавы Эмерсана Мнангагву з 83-годдзем.

“Пацвярджаю гатоўнасць Мінска, праверанага партнёра Харарэ, да рэалізацыі ўсёабдымнай “Дарожнай карты” супрацы на 2026–2030 гады і новых узаемавыгадных праектаў у розных сферах”, — прыводзіць словы віншавальніка яго прэс-служба.

На думку Лукашэнкі, палітыка Мнангагвы “прыносіць адчувальныя вынікі: Зімбабвэ ўпэўнена рухаецца шляхам мадэрнізацыі, карыстаецца заслужаным міжнародным аўтарытэтам”.

У аналагічным леташнім віншаванні Лукашэнка сцвярджаў, што на “меркаванне, багаты кіраўнічы і жыццёвы досвед” лідара Зімбабвэ “арыентуюцца не толькі суседзі, але і іншыя дзяржавы кантынента”.

Палітык таксама выказваў спадзеў на працяг “руху наперад <…> на карысць Беларусі і Зімбабвэ”. “Трымаючыся разам і абапіраючыся на ўзаемную дапамогу, мы зможам дасягнуць яшчэ больш высокіх вынікаў сацыяльна-эканамічнага развіцця для дабрабыту нашых народаў”, — падкрэсліваў Лукашэнка.

Беларускія ўлады актывізавалі кантакты з Зімбабвэ ў 2023 годзе, аднак актуальных звестак па двухбаковым тавараабароце няма. Па выніках 2022 года аб’ём узаемнага гандлю склаў каля 40 млн долараў, 2021-га — 25 млн, 2020-га — 33,6 млн долараў.

Лукашэнка наведваў Зімбабвэ з 30 студзеня па 1 лютага 2023 года. У красавіку таго ж года са шматдзённым візітам у Мінск прыязджала жонка прэзідэнта Зімбабвэ Аксілія Мнангагва.

У ліпені 2024 года яна зноў была ў Беларусі з візітам, на сустрэчы з ёй Лукашэнка заявіў, што чакае візіту ў Мінск прэзідэнта.

Па выніках перагавораў 14 траўня 2025 года ў Мінску Лукашэнка і прэзідэнт Зімбабвэ Эмерсан Мнангагва падпісалі дарожную карту стратэгічнага двухбаковай супрацы і партнёрства на 2026–2030 гады. Афрыканскі палітык прыбыў у Мінск пасля ўдзелу ва ўрачыстасцях з нагоды Дня перамогі ў Маскве.

Летась Беларусь двойчы накіроўвала ў Зімбабвэ гуманітарную дапамогу для пераадолення наступстваў засухі.