Экс-палітвязень Лазараў: Псіхалагічны стан Андрэя Паднябеннага быў цалкам добры

12 верасня, Позірк. Псіхалагічны стан палітвязня Андрэя Паднябеннага, які, паводле інфармацыі ягонай маці, быў знойдзены павешаным у ШІЗА магілёўскай папраўчай калоніі № 15, “быў цалкам добры, ён адназначна не пайшоў бы на самагубства”.

Пра гэта заявіў на прэс-канферэнцыі 12 верасня ў Вільнюсе былы вызвалены з няволі журналіст Вячаслаў Лазараў, спаслаўшыся на меркаванне зняволеных, якія адбывалі пакаранне разам з Паднябенным.

Тое, што Паднябеннага, пра гібель якога стала вядома 8 верасня, знайшлі павешаным, вынікае з пастоў ягонай маці Валянціны ў сацыяльнай сетцы “Одноклассники”.

“Андрэй прымудрыўся павесіцца незразумела на чым у ШІЗА калоніі пятнашкі”, — напісала жанчына, маючы на ўвазе магілёўскую папраўчую калонію № 15.

У іншым пасты Паднябенная падзялілася: “Чамусьці думала, што яго павесілі праз кансервавую бляшанку коштам 4000 у.е.”. Верагодна, гаворка ідзе пра спалены аўтамабіль, які ставілі ў віну яе загінуламу сыну.

36-гадовы Паднябенны памёр 3 верасня ў калоніі № 15 Магілёва, пра што паведаміла ягоная маці.

Паводле інфармацыі праваабарончага цэнтра “Вясна”, Паднябенны — грамадзянін Расіі, але з 6 гадоў жыў у Беларусі, маючы від на жыхарства. У 2021 годзе ў межах закрытага працэсу суддзя Анатоль Сотнікаў прыгаварыў яго да 15 гадоў пазбаўлення волі ў калоніі ўзмоцненага рэжыму паводле ч. 1 арт. 14 і ч. 3 арт. 218 (замах на наўмыснае знішчэнне або пашкоджанне чужой маёмасці), ч. 1 арт. 361¹ (стварэнне экстрэмісцкага фармавання), ч. 1 і 2 арт. 289 (акт тэрарызму) Крымінальнага кодэкса.

Палітвязень быў прызнаны вінаватым у падпале машыны начальніка ўпраўлення Дэпартамента выканання пакаранняў МУС, праколе колаў 39 тралейбусаў, стварэнні і адміністраванні канала і чата ў “Тэлеграме”, якія аднесены да “экстрэмісцкага фармавання”, а таксама падпале крана на будоўлі ў 2019 годзе.

3 студзеня 2023 года Гомельскі абласны суд вынес яшчэ адзін прысуд Паднябеннаму, абвінавачанаму дадаткова паводле ч. 1 і 2 арт. 361⁴ (садзейнічанне экстрэмісцкай дзейнасці), ч. 1 арт. 368 (абраза прэзідэнта), арт. 369 (абраза прадстаўніка ўлады), ч. 1 арт. 130 (распальванне іншай сацыяльнай варожасці і варажнечы). У выніку да 15 гадоў зняволення дадаліся яшчэ 1 год і 8 месяцаў пазбаўлення волі ва ўмовах узмоцненага рэжыму. Акрамя таго, палітвязень быў аштрафаваны на 1.000 базавых велічынь (на той момант 37 тыс. рублёў). Справу ў закрытым рэжыме разглядаў суддзя Руслан Царук.