Ларыса Шчыракова: Не дарую рэжыму тое, што ён катаваў сына

12 верасня, Позірк. Экс-палітвязняволеная журналістка Ларыса Шчыракова “не даруе рэжыму тое, што ён пастаянна катаваў яе непаўналетняга сына”, заявіла яна на прэс-канферэнцыі ў Вільнюсе 12 верасня.

Яна патлумачыла, што сілавікі не толькі затрымалі яе на вачах у сына, праводзілі “пастаянныя ператрусы” ў амуніцыі, але і потым, калі журналістку арыштавалі, прыходзілі да яго, “цягалі на допыты і зрабілі сведкам абвінавачвання”: “Аднойчы на допыце ён праз стрэс не змог успомніць, як завуць яго дзеда”.

Паводле Шчыраковай, ёй таксама цяжка дараваць рэжыму Аляксандра Лукашэнкі тое, што яе дэпартавалі за чатыры месяцы да заканчэння тэрміну зняволення, не даўшы магчымасці застацца ў краіне.

31 жніўня 2023 года Гомельскі абласны суд прыгаварыў Шчыракову да 3,5 года пазбаўлення волі паводле арт. 369¹ КК (дыскрэдытацыя Рэспублікі Беларусь), ч. 1 і 2 арт. 361⁴ КК (садзейнічанне экстрэмісцкай дзейнасці і тое ж дзеянне, здзейсненае паўторна).

Суддзя Мікалай Доля разглядаў справу ў закрытым рэжыме.

9 жніўня 2023 года Камітэт дзяржаўнай бяспекі прызнаў “экстрэмісцкім фармаваннем” “Гомельскую Вясну” — рэгіянальнае аддзяленне праваабарончага цэнтра “Вясна”. Да ўдзельнікаў гэтай групы ведамства залічыла Шчыракову.

“Гомельская Вясна” 15 жніўня таго ж года падкрэсліла, што Шчыракова спыніла займацца журналістыкай, занялася фотамастацтвам і вучылася на псіхолага.

Беларуская асацыяцыя журналістаў асудзіла прысуд, назваўшы яго “чарговай расправай і помстай журналістам”.

Шчыракова была затрыманая 6 снежня 2022 года. Яе сына Святаслава, якому на той момант было 15 гадоў, змясцілі ў гомельскі прытулак. Бацька, які прыехаў з Расіі, змог забраць падлетка на пяты дзень пасля звароту ва ўстанову. Яму не дазвалялі сустрэцца з сынам, запатрабаваўшы шэраг дакументаў, у тым ліку даведку з працы. Акрамя таго, бацька як грамадзянін РФ павінен быў аформіць рэгістрацыю ў Беларусі.

Да 2021 года Шчыракова супрацоўнічала з незалежнымі СМІ. Пасля яна публічна заявіла пра зыход з журналістыкі і пераключылася на этнаграфічныя фотасесіі.

У верасні 2024 года, знаходзячыся ў зняволенні, Ларыса Шчыракова стала лаўрэаткай прэміі Free Media Awards. Нарвежскі фонд Fritt Ord Foundation, які з’яўляецца адным з заснавальнікаў узнагароды, адзначаў, што Шчыракова ўганаравана прэміяй “за сваю доблесную і незалежную дзейнасць у Беларусі”.

Вызваленая 11 верасня і прымусова вывезеная ў Літву.