Польшча накіроўвае каля 40 тыс. вайскоўцаў на мяжу з Беларуссю і Расіяй

11 верасня, Позірк. У бліжэйшыя дні на мяжы Польшчы з Беларуссю і Расіяй будзе размешчана каля 40 тыс. польскіх вайскоўцаў. Пра гэта, паводле інфармацыі польскіх СМІ, заявіў 11 верасня намеснік міністра нацыянальнай абароны Цэзарый Томчык, звязаўшы рашэнне з беларуска-расейскімі вучэннямі “Захад-2025“, якія пачынаюцца 12 верасня.

“Давайце памятаць, што вучэнні “Захад” наступальныя. Яны паклалі пачатак вайне ва Украіне, а таксама агрэсіі супраць Грузіі. Таму польскія вайскоўцы да іх рыхтаваліся. У бліжэйшыя дні на мяжы будзе каля 40 тыс. нашых вайскоўцаў”, — сказаў намеснік міністра.

10 верасня стала вядома, што па прапанове аператыўнага камандавання Узброеных сіл Польшчы з 1 гадзіны ночы па мінскім часе 11 верасня да 2 гадзін 59 хвілін 10 снежня 2025 года ўведзеная беспалётная зона ўздоўж мяжы з Беларуссю і Украінай.

Раніцай 10 верасня польскія ўлады паведамілі аб масавым уварванні расійскіх дронаў на тэрыторыю краіны — першым за тры з паловай гады поўнамаштабнай агрэсіі РФ супраць Украіны. Паводле інфармацыі ўкраінскіх маніторынгавых каналаў, частка дронаў прыляцела ў Польшчу праз Брэсцкую вобласць. Варшава заявіла пра “акт агрэсіі”. Паведамлялася аб адным пашкоджаным жылым будынку. Для нейтралізацыі БПЛА задзейнічаліся сілы як Польшчы, так і іншых краін НАТО.

Увечары таго ж дня міністр унутраных спраў і адміністрацыі Польшчы Марцін Кервіньскі па прадстаўленні прэм’ер-міністра Дональда Туска падпісаў распараджэнне аб закрыцці мяжы з Беларуссю. Дакумент пачне дзейнічаць з паўночы 12 верасня.

“Мэта прыпынення памежнага руху на памежных пераходах з Беларуссю-забеспячэнне бяспекі мяжы Польшчы, якая адначасова з’яўляецца замежнай мяжой Еўрапейскага саюза“, — гаварылася ў паведамленні МУС.

“Закрываем мяжу з Беларуссю ў сувязі з пагрозай, якую нясуць манеўры “Захад”. Падначаленыя службы МУС і армія знаходзяцца ў найвышэйшай гатоўнасці. Гэтае рашэнне носіць часовы характар. Прыярытэт для нас-бяспека полек і палякаў. Пераходы адкрыем, калі будзем упэўненыя, што сітуацыя не будзе несці нам ні найменшай пагрозы“, — заявіў Кервіньскі.

Маштабныя вучэнні“ Захад-2025 ” пройдуць з 12 па 16 верасня. Будзе адпрацаванае “планаванне прымянення” ядзернай зброі і комплексу “ляшчына”, а таксама супрацьпаветраная абарона, абарончыя баявыя дзеянні, падтрымка тактычнай авіяцыі і інш.