Рыжанкоў: Мы вымушаныя лічыцца з дзеючымі ў дачыненні да Беларусі санкцыямі краін ЕС
10 верасня, Позірк. Беларусь і Венгрыя з’яўляюцца адзінымі краінамі Еўропы, якія “на справе адданыя палітыцы свабоднага рынку, роўных умоў і прынцыпаў сапраўды партнёрскіх адносін”, заявіў дзяржСМІ 10 верасня міністр замежных спраў Максім Рыжанкоў.
З каментарыямі ён выступіў па выніках перамоў з кіраўніком МЗС Венгрыі Петэрам Сіярта.
Венгерскі міністр прыбыў у Мінск на чале дэлегацыі, якая ўдзельнічае ў чарговым пасяджэнні двухбаковай міжурадавай камісіі па эканамічным супрацоўніцтве. Адначасова ў беларускай сталіцы праходзіць двухбаковы бізнес-форум з удзелам прадстаўнікоў дзелавых колаў дзвюх краін.
“Мы вымушаныя лічыцца з дзеючымі ў дачыненні да Беларусі санкцыямі краін ЕС. Аднак сённяшні бізнес-форум і шырокі ўдзел у ім прадстаўнікоў венгерскага боку паказваюць, што гэтыя не абгрунтаваныя нічым абмежаванні абсалютна не падтрымліваюцца ні бізнесам, ні людзьмі. Нават у гэтых умовах мы можам знаходзіць магчымасці для развіцця нашых адносін і рэалізацыі двухбаковых праектаў”, — сказаў Рыжанкоў.
“Мы вельмі цэнім стаўленне венгерскіх сяброў да сённяшняй сітуацыі ў Беларусі і будзем шанаваць гэта і ў далейшым, як бы ні складваліся нашы адносіны з Еўрапейскім саюзам”, — дадаў кіраўнік МЗС.
Сіярта рэгулярна наведвае Беларусь. Яго папярэднія візіты адбыліся ў лістападзе 2023 года і ў траўні і кастрычніку 2024-га. Падчас апошняга са згаданых візітаў па выніках перамоваў з Рыжанковым у Мінску ён выступіў супраць санкцый. “Мы, венгры, робім выснову, што, калі санкцыі не дзейнічаюць, не варта імі займацца, не варта іх навязваць”, — сказаў тады венгерскі міністр.
“Прытрымліваючыся стратэгіі эканамічнага нейтралітэту, мы не любім санкцыі. Мы лічым, што трэба прыбраць перашкоды і забяспечыць свабоду сусветнай эканоміцы для дзеяння”, — дадаў ён.
Урад Беларусі ўключыў Венгрыю ў спіс “недружалюбных” краін.
Пры гэтым Венгрыя застаецца адной з нямногіх краін Еўрасаюза, якая падтрымлівае публічныя кантакты з Мінскам, нягледзячы на тое, што як член ЕС яна далучылася да санкцый супраць рэжыму Аляксандра Лукашэнкі.
Гэта таксама пакуль адзіная дзяржава ЕС, амбасадар якой уручыў Лукашэнку даверчыя граматы пасля падзей 2020 года.
Мінск і Будапешт здольныя “ўнесці сумесны ўклад ва ўмацаванне рэгіянальнай бяспекі, ролі міжнароднага права і ўстойлівай стратэгічнай стабільнасці”, заявіў Лукашэнка, віншуючы 20 жніўня прэзідэнта Венгрыі Тамаша Шуёка і прэм’ер-міністра Віктара Орбана з нацыянальным святам — Днём святога Іштвана.
“Агульнасць падыходаў да суверэнітэту і незалежнасці разам з клапатлівым стаўленнем да нацыянальнай ідэнтычнасці, духоўнай спадчыны і традыцый сваіх дзяржаў — гэта тое, што здаўна аб’ядноўвае нашы народы і стварае перадумовы да паглыблення двухбаковага культурна-гуманітарнага ўзаемадзеяння”, — адзначыў віншавальнік.
Лукашэнка падкрэсліў, што Мінск шануе “дружалюбныя і прагматычныя” адносіны з Будапештам і выказаў надзею на працяг супрацоўніцтва “на аснове ўзаемнай падтрымкі і даверу”.
