9 верасня, Позірк. Тэндэнцыю інфляцыі, якая ўсё расце, “неабходна пераламаць”, заявіў Аляксандр Лукашэнка 9 верасня ў Мінску на нарадзе з апаратам Нацыянальнага банка і кіраўніцтвам банкаў.
На думку спікера, якую прыводзіць яго прэс-служба, “роля Нацбанка ў гэтым працэсе наогул пакуль слаба прасочваецца”.
“Нізкая інфляцыя патрэбная нашым прадпрыемствам для планавання доўгатэрміновых інвестыцый, — падкрэсліў Лукашэнка. — А людзям — для таго, каб не падала іх пакупніцкая здольнасць і не абясцэньваліся даходы і ашчаджэнні”.
Кажучы пра асноўныя задачы для банкаўска-фінансавай сістэмы, ён падкрэсліў, што важна “забяспечыць фінансавую стабільнасць”.
Адзначыўшы значны рост золатавалютных рэзерваў, спікер падкрэсліў, што “гэтаму ў значнай меры садзейнічаў рост сусветных цэн на золата”.
“Проста сядзець склаўшы рукі на “кубышцы”, напэўна, няправільна. Грошы павінны працаваць на выгадныя краіне інвестыцыйныя праекты (з хуткай аддачай) або доўгатэрміновыя экспартныя кантракты”, — лічыць Лукашэнка.
У сувязі з гэтым ён лічыць, што “трэба правільна выбудоўваць, а калі трэба — і пераналаджваць <…> стратэгію кіравання міжнароднымі рэзервовымі актывамі”.
На думку Лукашэнкі, сітуацыя на валютным рынку “павінна заставацца кантраляванай. Пры гэтым па-ранейшаму неабходна не дапускаць празмернай валацільнасці абменнага курсу нацыянальнай валюты”.
Амерыканская, агульная еўрапейская, а таксама кітайская валюты істотна падаражэлі на таргах Беларускай валютна-фондавай біржы 9 верасня — акурат тады, калі праходзіла нарада ў Палацы незалежнасці.
Як паведамляў “Позірк”, спажывецкія цэны ў ліпені 2025 года выраслі на 0,2%, у параўнанні са снежнем 2024 года — на 5,6%, з чэрвенем 2024-га — на 7,4%.
Міністэрства антыманапольнага рэгулявання і гандлю пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння цэн: у студзені цэны не павінны былі вырасці больш як на 0,7% (па факце — +0,7%), па выніках студзеня — лютага — на 1,9% (+2%), студзеня — сакавіка — на 2,2% (+2,8%), студзеня — красавіка — на 2,7% (+3,8%), студзеня — траўня — на 3% (+4,5%).
Далей: студзеня — чэрвеня — 3,3%, студзеня — ліпеня і студзеня — жніўня — 3,4%, студзеня — верасня — 3,7%, студзеня — кастрычніка — 4,1%, студзеня — лістапада — 4,4%, студзеня — снежня — 5% (гэтая адзнака з’яўляецца зацверджанай Аляксандрам Лукашэнкам на 2025 год).
Міжнародныя рэзервовыя актывы Беларусі на 1 верасня 2025 года склалі 12 млрд 413 млн долараў у эквіваленце, што з’яўляецца новым рэкордам, сведчаць папярэднія даныя Нацыянальнага банка.
За жнівень золатавалютныя рэзервы (ЗВР) выраслі на 471,4 млн долараў (+3,9%).
Манетарнае золата ў структуры ЗВР складае 5 млрд 939,5 млн долараў (+225,1 млн за месяц; +3,9%), спецыяльныя правы запазычання — 1 млрд 404,5 млн (-5,6 млн.; -0,4%), рэзервовыя актывы ў замежнай валюце — 5 млрд 68,8 млн (+251,8 млн; +5,2%).
Рэзервовая пазіцыя ў Міжнародным валютным фондзе і іншыя актывы засталіся ранейшымі — 0,03 млн і 0,1 млн долараў адпаведна.
На 1 студзеня рэзервовыя актывы складалі 8 млрд 922,6 млн долараў. Такім чынам, за восем месяцаў яны выраслі на 3 млрд 490,4 млн долараў (+39,1%).
