Долар, еўра і юань істотна падаражэлі на таргах 9 верасня

9 верасня, Позірк. Амерыканская, агульная еўрапейская, а таксама кітайская валюты істотна падаражэлі на таргах Беларускай валютна-фондавай біржы 9 верасня.

Курс долара вырас да 3,0592 рубля (+1,25%; +0,0378). На супастаўным узроўні ён апошні раз быў па выніках таргоў 24 красавіка, калі падаражэў з 3,0519 да 3,0675 рубля.

Каціроўка еўра вырасла да 3,588 рубля (+1,36%; +0,048), юаня — да 4,2815 за 10 (+1,3%; +0,055).

Расійскі рубель патаннеў да 3,6641 за 100 (-0,68%; -0,0252).

Аляксандр Лукашэнка 9 верасня на нарадзе з апаратам Нацыянальнага банка і кіраўніцтвам банкаў падкрэсліў, што “сітуацыя на валютным рынку павінна заставацца кантраляванай”. “Пры гэтым па-ранейшаму неабходна не дапускаць празмернай валацільнасці абменнага курсу нацыянальнай валюты”, — падкрэсліў ён.

На мінулым працоўным тыдні (1–5 верасня) падаражэлі ўсе асноўныя валюты: долар — на 1,22% (з 2,9731 да 3,0094), расійскі рубель — на 0,06% (з 3,6933 да 3,6955 за 100), еўра — на 0,83% (з 3,4575 да 3,4863), юань — на 0,94% (з 4,162 да 4,2011 за 10).

Даследчы цэнтр BEROC спрагназаваў дэфіцыт знешняга гандлю таварамі і паслугамі на ўзроўні 2% ВУП, які будзе суправаджацца “ўмераным ціскам на валютным рынку”.

Афіцыйны курс долара ў Беларусі за студзень — жнівень 2025 года знізіўся на 14,3% (з 3,4735 да 2,9769 рубля) — гэта другое месца на тэрыторыі былога СССР, сведчыць праведзены “Позіркам“ параўнальны аналіз каціровак цэнтрабанкаў на 31 снежня 2024 года і 31 ліпеня 2025-га (па выніках студзеня, студзеня — лютага, студзеня — сакавіка, студзеня — красавіка, студзеня — траўня, студзеня — чэрвеня, студзеня — ліпеня таксама другое месца, -1,73%, -8,54%, -10,25%, -12,16%, -13,7%, -14,6%, 12,97% адпаведна).

У 2024 годзе афіцыйны курс долара ў Беларусі вырас на 9,32% (з 3,1775 да 3,4735 рубля). Гэта чацвёрты паказчык на тэрыторыі былога СССР.