Рыжанкоў у панібрацкай форме прапанаваў старшыні Еўракамісіі фон дэр Ляен наведаць мяжу з беларускага боку

8 верасня, Позірк. Нагнятанне жарсцей вакол візіту старшыні Еўрапейскай камісіі Урсулы фон дэр Ляен на мяжу краін ЕС і Беларусі патрэбнае Бруселю, каб палохаць насельніцтва краін Еўрасаюза, абгрунтоўваць праблемы сацыяльна-эканамічнага развіцця, якія назіраюцца ў гэтых краінах, заняпад ўзроўню жыцця. З такім сцвярджэннем выступіў у праграме “Галоўны эфір“ на тэлеканале “Беларусь 1” міністр замежных спраў Максім Рыжанкоў.

На яго думку, гэта адбываецца таму, што ў ЕС “сёння разгарнулі маштабную кампанію па мілітарызацыі сваіх краін, рэгіёну і туды ідуць велізарныя сродкі, якія перастаюць выдаткоўвацца на падтрымку сацыяльных, інфраструктурных і іншых праектаў“. “Гэта значыць, ім трэба абгрунтаваць сваім грамадзянам, чаму яны пакутуюць, чаму пагаршаецца ўзровень жыцця і чаму пры тым мільярды ідуць на вайсковыя выдаткі“, — мяркуе Рыжанкоў. Доказаў пакут грамадзян краін ЕС і пагаршэння ўмоў іх жыцця ён не прывёў.

“Мы ж бачым гэтых палітыкаў з Бруселя і многіх краін ЕС, якія за кошт цесных кантактаў з ваенна-прамысловым лобі вырашаюць свае фінансавыя і палітычныя пытанні“, — заявіў міністр.

Ён станоўча адказаў на пытанне інтэрв’юера, ці з’яўляецца візіт фон дэр Ляен на мяжу з Беларуссю шоў.

“Калі ты хацела б разабрацца з тым, што адбываецца на мяжы — пад’едзь на пункт пропуску, пажадана з беларускага боку, падыдзі да тых людзей, якія стаяць у тысячах машын, якія палякі, літоўцы і латышы не пускаюць, альбо [да людзей] з якіх здзекуюцца на мяжы“, — у панібрацкай форме прапанаваў чыноўнік.

“Спытай, што людзі думаюць пра гэта, паглядзі, якое рэальнае стаўленне, пагавары з гэтымі жанчынамі, старымі, дзецьмі, якія днямі пакутуюць у чэргах, і тады ў цябе будзе дакладнае разуменне, хто каму што павінен і з-за каго ўсё гэта адбываецца. Пад’едзь у нашы цэнтры, дзе ўтрымліваюцца нелегальныя мігранты, якіх выціскаюць, збіваюць, забіваюць памежнікі спалучаных з намі краін Еўрасаюза“, — працягнуў Рыжанкоў, завочна звяртаючыся да фон дэр Ляен. Пры гэтым ён не прывёў першапрычыны закрыцця суседнімі краінамі ЕС часткі пунктаў пропуску, пераклаўшы адказнасць на іх.

У распаўсюджанай МЗС Беларусі 1 верасня заяве “ў сувязі з візітам у Польшчу і Літву прадстаўнікоў ЕС“ адзначаецца, што, “пакуль на ўсходзе і нават на Захадзе па той бок Атлантыкі робяць крокі для аднаўлення міру, у Брусэлі, прыкрываючыся лозунгамі аб “агульнай адказнасці“ і “абароне дэмакратычнага свету“, дэ-факта робяць усё для эскалацыі і пашырэння маштабаў канфлікту ў нашым рэгіёне”.

У беларускім знешнепалітычным ведамстве сцвярджаюць, што “такая бяздумная і, па сутнасці, у вышэйшай ступені безадказная палітыка еўрапейскіх бюракратаў — гэта прамая пагроза для будучыні самой Еўропы”.

Заяўляецца, што ў Брусэлі “аддаюць перавагу складаць усё новыя страшылкі і аб’яўляць “прыфрантавымі“ тэрыторыі, дзе, на шчасце, не вялося і не вядзецца ніякіх баявых дзеянняў“ — “замест таго каб абмяркоўваць рэальныя пытанні і разам шукаць доўгатэрміновыя рашэнні“.

МЗС абвінаваціў ЕC у правядзенні “агрэсіўнай і адкрыта мілітарысцкай палітыкі“, павелічэнні вайсковых выдаткаў і стварэнні “вобразу ворага са свайго суседа”. Пры гэтым у заяве нічога не сказана пра садзейнічанне Мінска Крамлю ў яго агрэсіі супраць Украіны, якое на гэтым этапе выражаецца ў выкананні ваенных заказаў.

31 жніўня і 1 верасня старшыня Еўракамісіі Урсула фон дэр Ляен наведала адпаведна польска-беларускую і літоўска-беларускую мяжу. Прадметам яе перамоваў з уладамі Польшчы і Літвы было ўмацаванне ўсходніх межаў ЕС.

Візіты адбыліся ў рамках паездкі кіраўніка ЕК ва ўсходнія краіны Еўрасаюза, каб “падкрэсліць падтрымку ЕС краін — членаў, якія сутыкаюцца з праблемамі, звязанымі з агульнымі межамі з Расіяй ці Беларуссю”.

29 жніўня МЗС Беларусі заявіў, што візіт фон дэр Ляен на беларуска-польскую і беларуска-літоўскую межы “мог бы стаць важным мерапрыемствам, што спрыяюць аб’ектыўнаму і ўсебаковаму аналізу працэсаў, якія адбываюцца“.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.