Прэзідэнт Польшчы Наўроцкі абмеркаваў у Ватыкане затрыманне ў Беларусі манаха-кармеліта

5 верасня, Позірк. Аб намеры “прыкладаць намаганні на міжнароднай арэне”, каб “бараніць інтарэсы палякаў за мяжой”, заявіў 5 верасня падчас візіту ў Ватыкан прэзідэнт Польшчы Караль Наўроцкі.

Асабліва гэта датычыцца палякаў, якія знаходзяцца ў зняволенні ў Беларусі, перадае словы Наўроцкага тэлеканал Polsat.

“Гэта адна з маіх задач як прэзідэнта Польшчы”, — падкрэсліў ён.

Паводле слоў палітыка, “праблема польскіх зняволеных у Беларусі” абмяркоўвалася на яго сустрэчы з дзяржаўным сакратаром Святога Пасада кардыналам П’етра Паралінам.

Таксама з прадстаўнікамі Ватыкана абмяркоўвалася тэма затрымання ў Беларусі польскага манаха-кармеліта Гжэгажа Гавела, гаворыцца ў паведамленні.

Пра затрыманне ў Лепелі (Віцебская вобласць) грамадзяніна Польшчы, які нібыта збіраў сакрэтную інфармацыю для спецслужбаў сваёй краіны, паведамлялася ў сюжэце дзяржаўнага тэлеканала “Беларусь 1”, які выйшаў у эфір 4 верасня.

Сцвярджалася, што супрацоўнікі КДБ затрымалі Гжэгажа Гавела 1998 года нараджэння (пазней высветлілася, што ён манах-кармеліт), які пражывае ў Кракаве. Нібыта ён праз сацыяльныя сеткі ўстанавіў кантакт з грамадзянінам Беларусі і прапанаваў яму супрацоўніцтва ў інтарэсах польскіх спецслужбаў.

Заяўляецца, што супрацоўніцтва заключалася ў канспіратыўным зборы і перадачы закрытай інфармацыі, звестак пра камандны склад, а таксама пра супрацоўнікаў беларускай ваеннай контрвыведкі. Атрыманую інфармацыю Гавел нібыта перадаваў польскім сілавікам.

У прыватнасці, сакрэтныя звесткі пра ваенныя аб’екты Беларусі ён збіраў для Агенцтва ўнутранай бяспекі, а за перадачу патрэбных даных абяцаў не названаму ў рэпартажы беларусу штомесячнае грашовае ўзнагароджанне.

Адзначаецца, што супрацоўнікі беларускай контрвыведкі затрымалі замежніка, як толькі ён атрымаў сакрэтны дакумент: у рэпартажы была прадэманстраваная раздрукоўка на 8 старонак фармату А4 паводле тэмы беларуска-расійскіх вучэнняў “Захад-2025”.

У дачыненні да грамадзяніна Польшчы распачата крымінальная справа паводле арт. 358 КК (шпіянаж), вядзецца следства. “Усе падрабязнасці” справы дзяржпрапаганда абяцала распавесці “пазней”. У пачатку рэпартажу было адзначана, што затрыманыя грамадзяне Беларусі і Польшчы, аднак падрабязнасцяў пра магчымых беларускіх фігурантаў справы прыведзена не было. У сюжэце бачна затрыманне двух чалавек, адзін з якіх Гавел.

Арышт польскага грамадзяніна з’яўляецца “чарговай правакацыяй” рэжыму Аляксандра Лукашэнкі, накіраванай супраць Польшчы, заявіў прэс-сакратар міністра спецслужбаў Яцэк Дабжыньскі.

Прэм’ер-міністр Польшчы Дональд Туск заявіў, што Варшава падрыхтуе меры ў адказ, калі сітуацыя, якая склалася з затрыманнем польскага грамадзяніна, не будзе вырашана ў бліжэйшы час.