Лукашэнка зноў заявіў пра жаданне “актывізаваць кантакты” з Малайзіяй
31 жніўня, Позірк. Зацікаўленасць у “далейшым умацаванні адносін” з Малайзіяй “на прынцыпах дружбы і ўзаемнай павагі” выказаў Аляксандр Лукашэнка, віншуючы 31 жніўня вярхоўнага кіраўніка гэтай азіяцкай дзяржавы султана Ібрагіма з Днём незалежнасці.
Паводле слоў віншавальніка, якога цытуе яго прэс-служба, Мінск таксама гатовы да “пашырэння міждзяржаўнага супрацоўніцтва па розных напрамках узаемнай цікавасці”.
“Рады адзначыць, што ва ўмовах геапалітычнай турбулентнасці мы падзяляем думку аб неабходнасці фарміравання больш справядлівага шматпалярнага свету. Разлічваем, што блізкасць падыходаў Беларусі і Малайзіі да глабальных пытанняў дасць магчымасць у бліжэйшы час актывізаваць палітычныя кантакты на ўсіх узроўнях і стварыць дзейсны механізм для развіцця двухбаковага ўзаемадзеяння — міжурадавую камісію па гандлёва-эканамічным супрацоўніцтве”, — гаворыцца ў пасланні.
У аналагічным віншаванні год таму Лукашэнка таксама заяўляў пра жаданне “актывізаваць двухбаковыя кантакты”.
“Спадзяемся на <…> правядзенне ўзаемных візітаў на розных узроўнях, гатовыя да сумеснай дзейнасці па развіцці дагаворна-прававой базы”, — адзначаў ён.
Паводле статыстычных даных ААН, экспарт Малайзіі ў Беларусь па выніках 2023 года склаў 112,4 млн долараў (пры гэтым за 2022-ты — 5 млн, 2021-ты — 3,9 млн, 2020-ты — 5,9 млн, 2019-ты — 4 млн, 2018-ты — 7,3 млн), імпарт — 21,8 млн (18,8 млн, 51,2 млн, 30,9 млн, 37,1 млн, 74,8 млн адпаведна).
31 жніўня Лукашэнка таксама павіншаваў з Днём незалежнасці прэзідэнта Кыргызстана Садыра Жапарава.
Ён падкрэсліў, што “за мінулыя дзесяцігоддзі Бішкек стаў значным партнёрам Мінска, у тым ліку на інтэграцыйных пляцоўках і ў міжнародных арганізацыях”.
“Пашырэнне беларуска-кыргызскага супрацоўніцтва на ўсіх узроўнях працягвае прыносіць канкрэтны і адчувальны вынік — рост аб’ёмаў узаемнага гандлю. Перакананы, што пры падтрымцы нашых народаў мы зможам прымножыць дасягненні двухбаковага ўзаемадзеяння па ўсіх ключавых напрамках, рэалізаваць новыя паспяховыя праекты”, — дадаў Лукашэнка.
Пры гэтым афіцыйны Мінск ігнаруе запыты кыргызскай генпракуратуры аб выдачы былога прэзідэнта Кыргызстана Курманбека Бакіева, які атрымаў палітычны прытулак у Беларусі ў 2010 годзе, завочна прыгаворанага на радзіме ўжо да некалькіх доўгіх тэрмінаў пазбаўлення волі па справах, звязаных з карупцыяй.
Беларусь і Кыргызстан з’яўляюцца партнёрамі ў рамках Еўразійскага эканамічнага саюза і Садружнасці Незалежных Дзяржаў, а таксама саюзнікамі ў Арганізацыі Дагавора аб калектыўнай бяспецы.
У канцы жніўня 2023 года дзяржаўныя СМІ паведамлялі, што па выніках 2022 года тавараабарот паміж Беларуссю і Кыргызстанам перавысіў 160 млн долараў.
Паводле даных МЗС, тавараабарот Беларусі з Кыргызстанам у 2021 годзе склаў 97,1 млн долараў (беларускі экспарт — 86,2 млн).
