Нацбанк другі месяц не мяняе разліковыя велічыні стандартнай рызыкі

28 жніўня, Позірк. Нацыянальны банк не стаў мяняць на верасень 2025 года ўстаноўленыя ў канцы чэрвеня (на ліпень і затым — на жнівень) разліковыя велічыні стандартнай рызыкі (РВСР).

Такім чынам, на працягу першага месяца восені РВСР па новых крэдытах на тэрмін да 3 гадоў у беларускіх рублях (за выключэннем ільготных) для юрыдычных асоб складуць 13,24%, на тэрмін большы за 3 гады — 12,12%; па новых крэдытах для фізічных асоб у беларускіх рублях (за выключэннем ільготных) — 19,1%, па новых тэрміновых безадзыўных банкаўскіх укладах (дэпазітах) фізічных асоб у нацыянальнай валюце з тэрмінам вяртання больш за 1 год — 15,64%.

РВСР не мяняліся тры месяцы, з сакавіка 2025 года, аднак у траўні Нацбанк увёў паасобныя стаўкі для крэдытаў, якія выдаюцца юрыдычным асобам, у залежнасці ад тэрміну (да або больш за 3 гады). РВСР для доўгатэрміновых крэдытаў стаў ніжэйшым.

Сістэму мер макрапрудэнцыйнага характару, скіраваную на абмежаванне сістэмнай рызыкі, якая генеруецца бізнес-мадэлямі банкаў з падвышаным рызыка-апетытам, Нацбанк увёў 1 сакавіка 2019 года.

У яе аснове ляжыць падыход, у адпаведнасці з якім да банкаў, якія рэалізуюць такія бізнес-мадэлі, прымяняюцца падвышаныя рэгулятарныя патрабаванні ў галіне дастатковасці капіталу, фармавання спецыяльных рэзерваў на пакрыццё магчымых страт і фармавання фонду абавязковых рэзерваў.

У якасці індыкатара, які паказвае на падвышаны ўзровень рызыкі бізнес-мадэляў, якія рэалізуюць банкі, выкарыстоўваецца перавышэнне вызначаных працэнтных ставак па новых укладах, крэдытах і эмітаваных аблігацыях над адпаведнымі РВСР. У аснове алгарытму разліку індыкатара ляжыць сярэдняе арыфметычнае, а таксама мера варыяцыі ўзятых у разлік працэнтных ставак.

23 чэрвеня Нацбанк абвясціў пра першае за апошнія два гады змяненне і першае за апошнія тры гады падвышэнне стаўкі рэфінансавання (з 9,5% да 9,75% гадавых). Новая стаўка дзейнічае з 25 чэрвеня.