Чарга легкавых аўтамабіляў на ўезд у Літву павялічылася за суткі ў паўтара раза

28 жніўня, Позірк. Уезду ў Еўрасаюз на 10:00 28 жніўня чакала 4.800 легкавых аўтамабіляў, вынікае з аператыўных звестак Дзяржаўнага пагранічнага камітэта.

Суткі таму на 10:00 гэтая колькасць складала 4.695. Павелічэнне на 105 адзінак (2,2%) у асноўным адбылося за кошт змены сітуацыі на мяжы з Літвой: тут на ўказаны час у пунктах пропуску Каменны Лог (з сумежнага боку Мядзінінкай) і Беняконі (Шальчынінкай) было 600 аўтамабіляў (суткамі раней 390, рост на 53,8%).

Як і раней, самы загружаны маршрут для легкавога транспарту праходзіць праз пункт пропуску на мяжы з Польшчай Брэст (Цярэспаль), там чарга за суткі зменшылася з 4.230 да 4.150 машын. Год таму 28 жніўня такіх аўто было 480 (у 8,6 раза менш).

На 10 гадзін у пункце пропуску Брэст уезду ў Польшчу чакала 7 аўтобусаў (суткамі раней — 13, год таму — 21).

Больш за ўсё аўтамабіляў — 4.770 — сабралася ў Брэсце тут у 2 гадзіны ночы 20 жніўня, рэкорд у чарзе аўтобусаў быў зафіксаваны ў 12 гадзін 19 жніўня — 157.

На мяжы з Латвіяй у пункце пропуску Грыгароўшчына (Патэрніекі) на 10 гадзін 28 жніўня было 50 аўтамабіляў (75 суткамі раней).

Чэргаў аўтобусаў на мяжы з краінамі Балтыі на ўказаны час не было.

Літоўскі кірунак застаецца самым загружаным для фур.

Перад памежнымі пераходамі Беняконі і Каменны Лог фіксуецца 610 грузавікоў, якія чакаюць уезду на сумежную тэрыторыю, што на 40 больш, чым суткі таму. Год таму такіх фур было 1.370.

Уезду ў Польшчу на кантрольным пункце Казловічы (Кукурыкі) чакала 10 фур (110 суткамі раней, год таму было 800).

Раней Дзяржпагранкамітэт заяўляў, што “закладнікамі сітуацыі, якая стала вынікам дзеянняў польскіх службаў, аказаліся звычайныя турысты, сярод якіх шмат грамадзян з краін Еўрасаюза”.

Польскія памежнікі тлумачылі павольнае праходжанне мяжы неабходнасцю больш дакладнай праверкі.

Брэст — адзіны даступны для падарожнікаў аўтамабільны пункт пропуску на мяжы Беларусі і Польшчы.

Пасля вынясення палітычна матываванага прысуду журналісту, актывісту неафіцыйнага Саюза палякаў Беларусі Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла другі аўтамабільны пункт — Баброўнікі (з беларускага боку Бераставіца).

8 жніўня 2023 года Літва закрыла пункты пропуску Шумскас (Лоша) і Твярячус (Відзы), 1 сакавіка 2024-га — Лаварышкес (Катлоўка) і Райгардас (Прывалка). На мяжы з Беларуссю працягваюць працаваць два пагранпераходы — Мядзінінкай (Каменны Лог) і Шальчынінкай (Беняконі).

19 верасня 2023 года з-за ўзрослай плыні нелегальных мігрантаў з боку Беларусі Латвія на нявызначаны тэрмін закрыла і забарыкадавала пункт пропуску Сілене (Урбаны).