Лукашэнка хоча, каб “разумныя таргашы” з прыватных сетак абслугоўвалі “неперспектыўныя вёскі”

26 жніўня, Позірк. Аб неабходнасці прыцягнуць гандлёвыя сеткі для абслугоўвання насельніцтва “ў невялікія вёскі, хай нават неперспектыўныя”, заявіў Аляксандр Лукашэнка 26 жніўня на нарадзе аб эфектыўнасці сістэмы рознічнага гандлю.

“Трэба забяспечыць баланс: будуеш прыбытковы бізнес у сталіцы і іншых буйных гарадах — вазьмі на сябе сацыяльную адказнасць па абслугоўванні спажыўца на вёсцы. Тым больш праблемных раёнаў не так ужо і шмат”, — цытуе Лукашэнку яго прэс-служба.

Паводле яго слоў, “усе разумныя гандляры рынуліся ў буйныя гарады, пабудавалі тут крамы, нядрэнна жывуць, праўда, на Лазурным беразе ўсе гаспадары і ўласнікі”. “Ну дык арганізуйце так, каб яны працавалі там, у глыбінцы”, — загадаў ён чыноўнікам, якія прысутнічалі на нарадзе.

Лукашэнка заявіў, што для жыхароў вёсак закрыццё крамы “спараджае масу праблем” і “выклікае заканамерныя прэтэнзіі”. Людзі, паводле яго сцвярджэння, скардзяцца “на нязручны графік працы аўтамагазінаў і бедны асартымент”, а таксама — на наяўнасць тавараў з мінулымі тэрмінамі прыдатнасці. “Пратэрміноўка — гэта чырвоная лінія! Гэтага быць не павінна”, — запатрабаваў прамоўца.

Ён падкрэсліў, што адказнасць за абслугоўванне насельніцтва ляжыць на мясцовых органах улады, якія “як ніхто” ведаюць, што адбываецца ў рэгіёнах, і “абавязаныя арганізаваць гандаль у раёнах так, каб не было ніякіх нараканняў”.

Схема арганізацыі гандлю, паводле яго слоў, павінна быць простай: у раённым цэнтры працуюць некалькі максімальна напоўненых таварамі гандлёвых цэнтраў, у аграгарадках — меншыя крамы. У вялікіх вёсках, паводле слоў Лукашэнкі, трэба “навесці парадак і арганізаваць працу звычайнай крамы”, а таксама — арганізаваць “зручны для людзей развазны гандаль або дастаўку (каапсаюз, пошта, прыватнік — усё роўна)”.

Лукашэнка таксама запатрабаваў спрасціць асобныя “неабдуманыя моманты ў арганізацыі гандлю”, у тым ліку ў сферы цыфравізацыі, сярод якіх — атрыманне электронных лічбавых подпісаў, маркіроўка тавараў “спецыяльнымі пазнакамі і знакамі, якія для невялікай крамкі ў тры паліцы — цэлы квэст”.

“У любой справе можна дайсці да абсурду, упаўшы ў адміністрацыйны раж. Даніна модзе — бесталковая цыфравізацыя, напрыклад, уліку і продажу малочных прадуктаў, выклікала бурнае абурэнне як пакупнікоў, так і прадаўцоў (аж да звальнення) ва ўсіх рэгіёнах”, — заявіў ён.

Па выніках нарады, як паведамляюць дзяржСМІ, Лукашэнка распарадзіўся да 1 студзеня 2026 года стварыць “эфектыўную сістэму гандлёвага абслугоўвання па ўсёй Беларусі”.

5 жніўня Лукашэнка падпісаў указ № 294, накіраваны на “стварэнне дадатковых умоў для развіцця гандлю на тэрыторыі сельскай мясцовасці васьмі раёнаў” — у Браслаўскім, Гарадоцкім, Дубровенскім, Талачынскім і Шаркаўшчынскім раёнах Віцебскай вобласці, Вілейскім раёне Мінскай вобласці, а таксама Касцюковіцкім і Хоцімскім раёнах Магілёўскай вобласці.

Сярод іншага дакумент ускладае персанальную адказнасць на старшыняў выканкамаў гэтых раёнаў і абласцей “за нездавальняючае гандлёвае абслугоўванне насельніцтва”.

Кіраўнікі юрыдычных асоб названых рэгіёнаў будуць асабіста адказваць за “неналежную арганізацыю рознічнага гандлю”.

З 1 ліпеня ў Беларусі стала абавязковым счытванне кода маркіроўкі некаторых тавараў для “не дапушчэння рэалізацыі пакупнікам фальсіфікаваных, кантрафактных тавараў”, паведамілі раней у Міністэрстве падаткаў і збораў. Новаўвядзенне ўскладніла і замарудзіла працу прадаўцоў, якім неабходна сканаваць не толькі лінейны штрыхкод, але і QR-код, і выклікала незадаволенасць пакупнікоў.